Եվրոպական Միության դիվանագիտության ղեկավար Կայա Կալլասը հրաժարվել է Մոսկվայի հետ բանակցողի պաշտոնի համար թեկնածու լինելուց։ Այս մասին, հղում անելով ԵՄ երեք դիվանագետների, հաղորդում է Politico-ն։

«Ցավոք, նա բացառել է իրեն թեկնածուների ցանկից», – ասել է ԵՄ բարձրաստիճան դիվանագետներից մեկը։

Անցյալ շաբաթ Կալլասը հայտարարել է, որ ցանկանում է անկախ ներկայացնել Եվրոպան Ռուսաստանի հետ երկխոսության մեջ։ «Կարծում եմ՝ կարողացել եմ տեսնել այն թակարդները, որոնք Ռուսաստանը լարում է», – ասել է նա այդ ժամանակ։ Կալլասը բանակցություններին իր հնարավոր մասնակցությունը բացատրել է նրանով, որ Բրյուսելը փորձում է սահմանել իր դերը ուկրաինական հակամարտության շուրջ բանակցություններում։

Հրապարակումը նշում է, որ Բրյուսելում «շարունակվում են ենթադրությունները» Ռուսաստանի հետ եվրոպական բանակցողի պաշտոնի համար այլ թեկնածուների մասին։ Օրինակ՝ Գերմանիայի նախկին կանցլեր Անգելա Մերկելը դիտարկվում է այդ պաշտոնի համար։

Սակայն, ինչպես գրում է Politico-ն, շատ եվրոպացիներ կարծում են, որ անցյալում միջնորդության ձախողված փորձերը «բավարար հիմք են նրա որակազրկման համար»։

Ֆինլանդիայի նախագահ Ալեքսանդր Ստուբը նույնպես դիտարկվում է այս պաշտոնի համար։ Սակայն, ինչպես նշում է հրատարակությունը, նրան անհրաժեշտ կլինի ԵՄ երկրների լայն աջակցությունը, և Ֆինլանդիայի անդամակցությունը ՆԱՏՕ-ին կարող է նվազեցնել նրա գրավչությունը Մոսկվայի համար։

Politico-ն նշում է, որ Իտալիայի նախկին վարչապետ Մարիո Դրագին մեկ այլ հնարավոր թեկնածու է, քանի որ նա հարգված է Եվրոպայում և համարվում է չեզոք դեմք։ Սակայն նա որևէ հետաքրքրություն չի ցուցաբերել ԵՄ-ի բանակցողի պաշտոնում ծառայելու հարցում։