ԶԼՄ ներկայացուցիչների հետ հանդիպման ընթացքում Սամվել Կարապետյանը անդրադարձել է ՀԱՊԿ-ի դերին և Հայաստանի հնարավոր արտաքին քաղաքական քայլերին։

Նրա խոսքով՝ եթե ՀԱՊԿ-ը չկարողանա գործել արդյունավետ և ներկայում էլ չարդարացնի Հայաստանի ակնկալիքները որպես անվտանգության ապահովման մեխանիզմ, ապա այդ հարցի շուրջ անհրաժեշտ հետևություններ կարվեն շատ կարճ ժամանակում։

Կարապետյանը նշել է, որ եթե պարզվի՝ կազմակերպությունը գործնականում օգտակար չէ, ապա Հայաստանը կարող է քննարկել դրանից դուրս գալու տարբերակը։ Միևնույն ժամանակ նա քննադատել է գործող իշխանություններին՝ նշելով, որ նրանք երկար ժամանակ խոսում են ՀԱՊԿ-ի անարդյունավետության մասին, սակայն դեռ չեն կայացրել վերջնական որոշում, ինչի վերաբերյալ նա հարցադրում է արել՝ ինչու մինչ այժմ այդ քայլը չի արվել։

Նա նաև ենթադրել է, որ երկրի ներկայիս դիրքորոշման պատճառները կարող են կապված լինել արտաքին ճնշումների կամ տարածաշրջանային դերակատարների ազդեցության հետ։

Խոսելով հնարավոր այլընտրանքների մասին՝ Կարապետյանը ընդգծել է, որ Ռուսաստանը շարունակում է մնալ կարևոր գործընկեր Հայաստանի համար, մինչդեռ այլ ուղղություններով դեռևս հստակ և կայուն այլընտրանքներ չեն ձևավորվել։ Նրա խոսքով՝ ցանկացած որոշում պետք է ընդունվի ոչ թե հուզական, այլ մանրակրկիտ վերլուծության արդյունքում՝ հաշվի առնելով երկրի երկարաժամկետ անվտանգությունն ու շահերը։

Նա նաև նշել է, որ իշխանության գալու դեպքում պատրաստ է վերանայել բոլոր հարցերը: