ՄԱԿ-ը խստորեն դատապարտում է խաղաղ քաղաքացիների և քաղաքացիական ենթակառուցվածքների վրա հարձակումները, հայտարարել է կազմակերպության գլխավոր քարտուղարի ներկայացուցիչ Ստեֆան Դյուժարիկը Լուգանսկի հանրակացարանի վրա Ուկրաինայի հարձակմանն անդրադառնալով։

Ավելի վաղ հայտնի էր դարձել, որ մայիսի 22-ի գիշերը Ուկրաինայի զինված ուժերը, ինքնաթիռատիպ 4 ԱԹՍ–ների օգնությամբ, Ստարոբելսկում հարձակվել էին Լուգանսկի պետական ​​մանկավարժական համալսարանի քոլեջի ուսումնական մասնաշենքի և հանրակացարանի վրա։ Հարվածի պահին 5-հարկանի հանրակացարանում, որը փլուզվել է մինչև 2-րդ հարկը, 14-18 տարեկան 86 երեխա է եղել։ Այս պահին հայտնի է 40 տուժածների և 15 անհետ կորածների մասին։ Կան նաև զոհեր։ Ողբերգության վայրում փրկարարական աշխատանքներ են ընթանում։ Վնասվել են մոտակա վարչական շենքերը, բնակելի շենքերը և սոցիալական օբյեկտները։ Ահաբեկչության մասին քրգործ է հարուցվել։

ՄԱԿ-ի գլխավոր քարտուղարի ներկայացուցիչը նշել է, որ նման գործողությունները կոպտորեն խախտում են միջազգային մարդասիրական իրավունքը, և կոչ է արել խուսափել այնպիսի քայլերից, որոնք կարող են սրել հակամարտությունը։

«Մենք վճռականորեն դատապարտում ենք քաղաքացիական բնակչության և քաղաքացիական ենթակառուցվածքների վրա ցանկացած հարձակում, որտեղ էլ որ դրանք տեղի ունենան։ Ինչպես բազմիցս ընդգծել է գլխավոր քարտուղարը, նման հարձակումները արգելված են միջազգային մարդասիրական իրավունքով և պետք է անհապաղ դադարեցվեն։ Մենք կոչ ենք անում շահագրգիռ բոլոր կողմերին զերծ մնալ ցանկացած գործողություններից, որոնք կարող են էլ ավելի սրել արդեն իսկ վտանգավոր իրավիճակը», – ասվում է ՌԻԱ Նովոստիի համար Դյուժարիկի հայտարարության մեջ։