Ինչ է լինում, երբ ՌԴ նախագահի համբերության բաժակը լցվում է
Wed, 27 May 2026 14:34:37 +0400
Ռուսաստանի նախագահի վարքագիծը, ըստ Հայաստանի երկրորդ նախագահի, բնութագրվում է բարձր համբերատարությամբ և զգուշավոր ձևակերպումներով, սակայն այդ համբերությունը ունի իր սահմանը։ Այդ մասին մի շարք լրատվամիջոցների հետ հարցազրույցում ասել է Հայաստանի երկրորդ նախագահ Ռոբերտ Քոչարյանը։
Նրա գնահատմամբ՝ Վլադիմիր Պուտինը երկար ժամանակ փորձում է խնդիրները լուծել զսպված և փուլային մոտեցմամբ, սակայն մի պահ իրավիճակը կարող է հասնել այն կետին, երբ Ռուսաստանը և նրա ղեկավարությունը պատրաստ են անցնել ավելի կտրուկ գործողությունների։ Քոչարյանը այս համատեքստում հիշեցրել է Ուկրաինայի օրինակը՝ նշելով, որ այնտեղ ևս Արևմուտքի ուղղությամբ քաղաքական շարժը երկար ժամանակ դիտարկվել է և փորձ է արվել զսպել տարբեր մեթոդներով։
Նրա խոսքով՝ նման իրավիճակներում մեղմ և հանդուրժող արձագանքները հաճախ սխալ են ընկալվում որպես համաձայնություն կամ թույլ դիրքորոշում, ինչը կարող է վտանգավոր սխալ հաշվարկների բերել։ Քոչարյանը նշել է, որ երբեմն արտաքին ազդակները ընկալվում են այնպես, կարծես հնարավոր է դրանք հեշտությամբ փոխել կամ ազդել դրանց վրա տարբեր քաղաքական ճնշումներով, սակայն դա միշտ չէ, որ համապատասխանում է իրականությանը։
«Ռուսաստանի նախագահը շատ համբերատար է, և միշտ փորձում է ավելի մեղմ ձևակերպումներ տալ, բայց նաև իր գործունեությունը թույլ է տալիս գնահատել, որ գալիս է մի պահ, երբ այդ համբերության բաժակը լցվում է և ինքը անձամբ և երկիրը պատրաստ է լինում շատ կտրուկ քայլերի»,- ասել է Քոչարյանը:
Անդրադառնալով ներքաղաքական հայտարարություններին, ըստ որոնց ընդդիմությունը ներկայացվում է որպես Ռուսաստանի ազդեցության տակ գտնվող ուժ, Քոչարյանը նշել է, որ այդպիսի մեղադրանքները քաղաքական պայքարի մաս են և նույն տրամաբանությամբ կարելի է հակառակ մեղադրանքներ հնչեցնել գործող իշխանությունների հասցեին՝ ասելով, որ նրանք կարող են ուղղորդվել արևմտյան կենտրոններից, այդ թվում՝ Բրյուսելից կամ Վաշինգտոնից։
Նա ընդգծել է, որ նման հռետորաբանությունը խորացնում է հասարակության բաժանումը և վերածում քաղաքական դիսկուրսը արտաքին կողմնորոշումների շուրջ հակադրության։