Հոգևորականներն ու հավատացյալները միասնաբար աղոթեցին անազատության մեջ գտնվող հոգևոր հայրերի համար
Fri, 29 May 2026 23:44:14 +0400
Արագածոտնի թեմն այսօր դարձյալ համախմբվել էր միասնական աղոթքի։
Թեմի վարչական խորհրդի ատենապետ Հոգեշնորհ Տեր Շնորհք աբեղա Պալոյանի հանդիսապետությամբ, հոգևոր դասի մասնակցությամբ, Չքնաղի Սուրբ Ստեփանոս եկեղեցում կատարվեց միասնական ժամերգություն:
Թեմի հոգևոր դասին աղոթակից էր նաև Մայր Աթոռ Սուրբ Էջմիածնի միաբան, Իզմիրլյան ԲԿ-ի հոգևոր տեսուչ՝ Հոգեշնորհ Տեր Հովհաննես աբեղա Թորգոմյանը:
Հոգևորականներն ու հավատացյալները միասնաբար աղոթեցին անազատության մեջ գտնվող մեր հոգևոր հայրերի և զավակների, հայրենիքի և Սուրբ եկեղեցու անսասանության համար:
Ժամերգության ընթացքում իր խոսքն ու պատգամը հավատացյալների փոխանցեց Սուրբ Ստեփանոս եկեղեցու հոգևոր հովիվ՝ Արժանապատիվ Տեր Մուշե քահանա Վահանյանը:
Տեր Հայրն իր խոսքում անդրադառնալով Իր զավակների հանդեպ ունեցած Տիրոջ անսահման սիրուն, պատգամեց հավատարիմ մնալ քրիստոնեական այն կերպարին ուր արժեքներին,որոնք Աստված պարգևել է մարդկությանը և նշեց. «Աստված ասաց.ես սեր եմ և սիրում եմ նրան, ով ինձ սիրում է և կապրեմ նրա մեջ, ով սեր ունի ու սիրո հանդեպ վերաբերմունք գիտի:
Այսօր մենք եկել ենք տաճար, որ ասենք. Տե՜ր արթնացրու մեր սերը, եթե այն կորցրել ենք»:
Միատեղ ու միասիրտ աղոթքն ավարտվեց Հայր Սուրբի Պահպանիչ աղոթքով ու Հայրապետական մաղթերգով։
Միասնական հաջորդ ժամերգությունը կկատարվի հունիսի 5-ին, ժամը 19:00-ին, Կոշի Սուրբ Ստեփանոս վանքում: