ՄԱԿ-ը սնանկացման եզրին․ երկու գերտերություն է մեղավոր
Sun, 31 May 2026 23:55:17 +0400
ՄԱԿ-ը սնանկացման եզրին է, քանի որ Չինաստանն ու ԱՄՆ-ն իրենց վճարումները չեն կատարել կազմակերպությանը: Այս մասին գրում է Wall Street Journal թերթը։
Նշվում է, որ ԱՄՆ-ն ունի 4 մլրդ դոլարի ժամկետանց վճարումներ։ Վաշինգտոնը դուրս է եկել նաև կազմակերպության տասնյակ ծրագրերից և գործակալություններից, այդ թվում՝ ԱՀԿ-ից։ Չինաստանն իր հերթին ՄԱԿ-ին պետք է 455 մլն դոլար վճարի։
Թերթն ընդգծում է, որ ՄԱԿ-ի բազային ծախսերը 42 տոկոսով կախված են ԱՄՆ-ի և Չինաստանի վճարումներից:
Ֆինանսական դժվարությունների ֆոնին կազմակերպությունը վերացրել է քարտուղարությունում երեք հազար պաշտոն և փակել գրասենյակների մի մասը։
Չինաստանը խոստանում է կատարել իր ֆինանսական պարտավորությունները։ ԱՄՆ-ում ասում են, որ ապագա ֆինանսական աջակցությունը կախված է ծախսերի կրճատումից, այդ թվում՝ աշխատատեղերի կրճատումից, բիզնես դասով ճամփորդությունների թվի նվազումից և մեքենայական թարգմանիչների օգտագործումից:
ՄԱԿ-ի գլխավոր քարտուղար Անտոնիու Գուտերեշը նախազգուշացրել է, որ կազմակերպությունը գտնվում է «սնանկության մրցավազքի մեջ» և հայտարարել է կազմակերպության ֆինանսական փլուզման միանգամայն իրական հեռանկարի մասին: Ըստ կանխատեսումների՝ կազմակերպության միջոցները կսպառվեն օգոստոսի կեսերին։