«Facebook»-ը և «Messenger»-ը գլոբալ խափանումներով են աշխատում
Fri, 12 Jun 2026 18:46:12 +0400
Այսօր՝ հունիսի 12-ին, աշխարհի տարբեր երկրներում հազարավոր օգտատերեր բախվել են Facebook-ի և Messenger-ի աշխատանքի խափանումների։ Մոտ մեկ ժամ շարունակ շատերը չեն կարողացել մուտք գործել իրենց հաշիվներ, ուղարկել կամ ստանալ հաղորդագրություններ։ Խնդիրները որոշ օգտատերերի մոտ շարունակվում են նաև այս պահին։ Որոշ դեպքերում օգտահաշիվներից ավտոմատ դուրս է գալիս և օգտատերերը չեն կարողանում կրկին մուտք գործել։ Խափանումները չեն սահմանափակվել միայն Facebook-ով։ Խնդիրներ են արձանագրվել նաև Instagram-ում, իսկ որոշ օգտատերեր նշում են, որ ժամանակավորապես խաթարվել է նաև WhatsApp-ի աշխատանքը։ Արտակարգ իրավիճակների և առցանց ծառայությունների աշխատանքը հետևող հարթակներում կտրուկ աճել է բողոքների թիվը։ Որոշ տվյալներով՝ Facebook-ի վերաբերյալ գրանցվել է ավելի քան 100 հազար խափանման մասին հաղորդում, ինչը վկայում է խնդրի լայնածավալ բնույթի մասին։
Այս պահի դրությամբ Meta ընկերությունը պաշտոնական մանրամասն պարզաբանում չի ներկայացրել խափանման պատճառների վերաբերյալ և չի հայտնել, թե երբ ամբողջությամբ կվերականգնվի ծառայությունների բնականոն աշխատանքը։