ՔՊ-ն փոխում է կառավարության անդամների երդման տեքստը։ Նախագծի հեղինակներն առաջարկում են այնտեղից հանել այն ձևակերպումները, որոնք համազգային բովանդակություն ունեն։ Կարծես թե խնդիրը բառերի մեջ է եղել, ոչ թե վերջին տարիների քաղաքականության, որոշումների ու ձախողումների։

Սա նույնն է, թե թռչունի թևերը կտրես ու ասես՝ գետնին նստած կուտդ կեր, իրավունք չունես երկնքին նայելու։ Երբ ազգայինը, պետականը, համազգային պատասխանատվությունը դուրս են մղվում, պետությունն էլ աստիճանաբար վերածվում է մի գրասենյակի, որտեղ պաշտոնյաները երդվում են ոչ թե ժողովրդի, այլ իշխանության առաջ։

Նրանց պատկերացմամբ՝ Հայաստանը կառավարության շենքն է, որտեղ նստում են կառավարության անդամները, և նրանք պարտավոր են երդվել միայն այն քաղաքական գծին, որն այսօր թելադրվում է վերևից։ Երդվել այն թեզերով, որոնք վերջին տարիներին Ալիևը գծում է, իսկ Փաշինյանը ներկայացնում է որպես անխուսափելի իրականություն։

Ամենաուշագրավն այն է, որ այս ամենի ֆոնին նրանք կրկին երդվելու են պահպանել սահմանադրական կարգը։ Բայց երդման արժեքը որոշվում է ոչ թե տեքստով, այլ երդվողի վարքով։ Երբ խոսքն ու գործը տարիներ շարունակ իրար հակասում են, ամենագեղեցիկ երդումն անգամ դառնում է դատարկ ձևականություն։

Ի վերջո, պետական ճգնաժամերը բառերի պատճառով չեն առաջանում։ Ոչ մի երկիր չի պարտվում սխալ գրված երդման պատճառով։ Երկրները պարտվում են, երբ իշխանությունները դադարում են պատասխանատու լինել իրենց խոսքի, որոշումների և հետևանքների համար։

Վստահությունը չի վերադառնում խմբագրված նախադասություններով։ Վստահությունը չի կառուցվում բառեր ջնջելով կամ ավելացնելով։ Եթե մարդիկ չեն հավատում իշխանությանը, պատճառը երդման տեքստը չէ։ Պատճառը այն քաղաքականությունն է, որի ականատեսն են եղել տարիներ շարունակ։

Ինչևէ, կարող եք փոխել տեքստը, նոր երդումներ ավելացնել, հին ձևակերպումներ հանել։ Կարող եք վերաշարադրել յուրաքանչյուր նախադասություն։ Բայց ոչ մի խմբագրում չի կարող վերականգնել կորցրած վստահությունը։

Մարդիկ չեն կարդում ձեր երդման տեքստը, մարդիկ գնահատում են ձեր գործերը։ Իսկ երբ գործերը հակասում են խոսքերին, երդումը դառնում է պարզապես արարողակարգային տեքստ։ Խնդիրը երբեք էլ երդման բառերը չեն եղել։ Խնդիրը դրանք արտասանողներն են։ Ոչ թե երդման տեքստը, այլ ձեզ պիտի փոխել, որպեսզի, ինչպես դուք եք սիրում ասել, ՀՀ քաղաքացին իսկապես ապագա ունենա։