Իսրայելն ու Լիբանանը կրկին բանակցում են․ կարևոր մանրամասներ
Wed, 24 Jun 2026 14:30:29 +0400
Իսրայելը և Լիբանանը բանակցություններ են վարում Լիբանանի հարավից իսրայելական զորքերի փուլային դուրսբերման շուրջ՝ ԱՄՆ-ի կողմից աջակցվող «փորձնական» նախագծի շրջանակներում, հաղորդում է իսրայելական Kan հեռուստաալիքը՝ հղում անելով բանակցություններին ծանոթ աղբյուրներին։
Նախաձեռնության նպատակն է ստեղծել «Հզբոլլահ»-ից զերծ հատուկ անվտանգության գոտիներ՝ ԱՄՆ-ի և Իսրայելի խիստ հսկողության ներքո։
Նախագծին մասնակցող լիբանանյան զինվորականները կանցնեն հատուկ ստուգում և վարժեցում՝ ԱՄՆ հսկողության ներքո՝ համոզվելու համար, որ նրանք կապված չեն «Հզբոլլահ»-ի հետ։
Վաշինգտոնում, ԱՄՆ միջնորդությամբ, տեղի են ունենում քննարկումներ կոնկրետ տարածքների (այսպես կոչված փորձնական գոտիների) և իսրայելական զորքերի մասնակի դուրսբերման պայմանների վերաբերյալ։
Իսրայելի ղեկավարությունը հայտարարում է, որ Լիբանանի հարավում ռազմական գործողությունները կշարունակվեն մինչև անվտանգության պայմանների ապահովումը։ Իսրայելի պաշտպանության բանակը պնդում է պահպանել գործողությունների գործառնական ազատությունը՝ կանխելու համար զինյալների ենթակառուցվածքների վերակառուցումը նույնիսկ լիբանանյան բանակի կողմից մուտք գործած տարածքներում։