Ինչու են ձերբակալել Չալաբյանին՝ ըստ Մենուա Սողոմոնյանի
Wed, 24 Jun 2026 15:18:20 +0400
«ՀայաՔվե» նախաձեռնության անդամ Մենուա Սողոմոնյանը լրագրողների հետ զրույցում անդրադարձել է Ավետիք Չալաբյանի դեմ հարուցված քրեական վարույթին՝ այն որակելով քաղաքական հետապնդում։
Նրա խոսքով՝ Չալաբյանի նկատմամբ իրականացվող գործողությունները տեղավորվում են այն տրամաբանության մեջ, որի նպատակը, ըստ նրա, Հայաստանի վրա «ալիևյան սահմանադրություն» պարտադրելն է։ Սողոմոնյանը պնդել է, որ վերջին ընտրությունների ընթացքում գործող իշխանությունները, չնայած իր գնահատմամբ կիրառված ճնշումներին, ուղղորդումներին և կեղծիքներին, չեն կարողացել ստանալ ընտրողների պարզ մեծամասնության աջակցությունը։
Նա նաև հայտարարել է, որ իշխանությունները, ըստ իրեն, կանգնած են արտաքին քաղաքական կամ քաղաքական «պատվերները» չկատարելու խնդրի առաջ։ Սողոմոնյանի համոզմամբ՝ իշխանություններից հաշվետվություն է պահանջվում, որպեսզի Հայաստանում հնարավոր լինի անցկացնել այդ փոփոխությունները։
Վերջինիս կարծիքով՝ այդ գործընթացների դեմ բարձրաձայնող հասարակական գործիչները հայտնվում են թիրախում, և նրանց փորձում են հեռացնել հանրային խոսքից։ Որպես օրինակ նա նշել է նաև Ալեն Ղևոնդյանի հետ կապված դեպքը՝ այն ներկայացնելով նույն տրամաբանության շարունակություն։