Վենեսուելայում տեղի են ունեցել երկու հզոր երկրաշարժեր՝ մեկը հյուսիսային, մյուսը՝ կենտրոնական շրջաններում։

Վենեսուելայի Ներքին գործերի նախարարությունը հայտնել է Կարակասում բնակելի շենքերի և այլ կառույցների փլուզման մասին։ Նախագահի պաշտոնակատար Դելսի Ռոդրիգեսը երկրում հայտարարել է արտակարգ դրություն։ Նա հայտարարել է, որ Կարակասի օդանավակայանը փակվել է երկրաշարժի պատճառով։ Ռոդրիգեսի խոսքով՝ երկու հզոր երկրաշարժերին հաջորդել է 20 հետցնցում, հաղորդում է Deutsche Welle-ն։

ԱՄՆ երկրաբանական ծառայությունը (USGS) կանխատեսել է, որ երկրաշարժի հետևանքով զոհերի թիվը կարող է կազմել 10,000-ից մինչև 100,000։ Վենեսուելայի իշխանությունները դեռևս պաշտոնապես չեն հայտնել զոհերի մասին։

Երկիրը նախ հարվածել է 7.2 մագնիտուդով երկրաշարժը, որին մեկ րոպեից էլ քիչ անց հաջորդել է մեկ այլ՝ 7.5 մագնիտուդով մեկ այլ ստորգետնյա ցնցում։ Առաջին երկրաշարժի էպիկենտրոնը, որը տեղի է ունեցել տեղական ժամանակով մոտավորապես ժամը 18:00-ին, գտնվել է Մորոն քաղաքից մոտավորապես 28 կիլոմետր դեպի արևմուտք, որը գտնվում է երկրի Կարիբյան ծովի ափին, Կարակասից մոտավորապես 168 կիլոմետր հեռավորության վրա։

Հաջորդող երկրաշարժի էպիկենտրոնը գտնվել է Մորոնից 16 կիլոմետր հեռավորության վրա, 10 կիլոմետր խորությամբ։

Վենեսուելայի ներքին գործերի նախարար Դիոսդադո Կաբելլոն հայտնել է, որ հրշեջները և ոստիկանությունը արձագանքում են ավերածությունների հետևանքներին՝ «բոլոր հասանելի միջոցներով»։