Իրանն ու ԱՄՆ-ն այսօր կրկին կբանակցեն․ Փեզեշքիանը հայտարարություն է արել
Tue, 30 Jun 2026 12:00:34 +0400
Իրանը կկատարի հուշագրով ստանձնած իր պարտավորությունները, եթե նույնը անի ԱՄՆ-ն։ Այս մասին հայտարարել է Իրանի նախագահ Մասուդ Փեզեշքիանը։
«Փոխըմբռնումը երկկողմանի երթևեկությամբ փողոց է։ Եթե ամերիկյան կողմը պահպանի համաձայնագիրը, մենք նույնպես կկատարենք մեր պարտավորությունները։ Մեր մոտեցումը ոչ խելամիտ սնապարծության և անհիմն սպառնալիքների նկատմամբ այն է, որ որոշումների կայացման ժամանակ պետք է հիմնվել ռացիոնալության և մարդկային արժանապատվության վրա, ինչպես նաև վճռականորեն ու անվախ պաշտպանվել, երբ գործելու ժամանակն է գալիս», – Х–ում գրել է Իրանի նախագահը։
Ավելի վաղ Axios պարբերականը գրել էր, որ ԱՄՆ-ն և Իրանը ծրագրում են հունիսի 30-ին Կատարի մայրաքաղաքում բանակցություններ անցնացնել Հորմուզի նեղուցի շուրջ, այդ տեղեկությունը հաստատել է ԱՄՆ նախագահ Դոնալդ Թրամփը:
Սպիտակ տունը ավելի ուշ նշել է, որ Դոհա կմեկնեն բանակցողներ Ջարեդ Քուշները և Սթիվ Ոիիտկոֆը: Միևնույն ժամանակ Իրանի ԱԳՆ–ն հայտարարեց, որ իրանական պատվիրակությունը մտադիր չէ մեկնել ԱՄՆ–ի հետ բանակցությունների:
Իրավիճակը կրկին սրվեց հունիսի 27-ից հետո։ ԱՄՆ-ն և Իրանը փոխադարձ հարվածներ հասցրին։ ԱՄՆ ԶՈւ կենտրոնական հրամանատարությունը հաստատեց Իրանին հարվածներ հասցնելը՝ ի պատասխան իբր Հորմուզի նեղուցում առևտրային նավի վրա հարձակման։ Ավելի ուշ իրանական ուժերը հարվածներ հասցրին Մերձավոր Արևելքում գտնվող ԱՄՆ ԶՈւ տեղակայման մի քանի վայրերին։
Հավելենք՝ վերջին էսկալացիայից 10 օր առաջ` հունիսի 18-ին, Իրանն ու ԱՄՆ-ն հեռավար ձևաչափով հուշագիր ստորագրեցին, որի նպատակն է դադարեցնել փետրվարի 28-ին սկսված ռազմական հակամարտությունը: