«Գինեսների տունը»․ արժե դիտել
Tue, 30 Jun 2026 23:55:20 +0400
Պատմական սերիալները, բացի այն, որ ներկայացնում են անցյալում տեղի ունեցածը, նաեւ դարձել են յուրատեսակ «լաբորատորիաներ», որտեղ բարձրացվում են այնպիսի հարցեր, ինչպիսիք են՝ իշխանություն, կապիտալ, ընտանեկան հարաբերություններ, հանրային փոփոխություններ։ Նման նախագիծ է «Գինեսների տունը» սերիալը։ Ռեժիսորը Սթիվեն Նայթն է։ Ժանրային առումով այն պատմական դրամա է։ Գործողությունները ծավալվում են 19-րդ դարի Դուբլինում, որտեղ Բենջամին Լի Գինեսի մահվանից հետո ժառանգները պայքարում են միմյանց հետ՝ Իռլանդիայի խոշորագույն գարեջրագործական ընկերությանը տիրանալու համար։ Առաջին հայացքից սերիալը գարեջրագործների ընտանիքին նվիրված պատմական գործ է։ Սակայն առաջին իսկ սերիաներից զգացվում է, որ ասելիքը հաջողության գնի, սերունդների հակամարտության, բիզնեսի նկատմամբ բարոյական պատասխանատվության եւ ինդուստրիալ հեղափոխության շրջանում եվրոպական հասարակության փոփոխման մասին է։
Սթիվեն Նայթի այս նախագծում ֆինանսական շահերը ձուլվում են անձնական հավակնությունների հետ, ընտանեկան հարաբերություններն ընթանում են մշտական դիմակայության տեսքով։ Ժառանգներից յուրաքանչյուրը, որ պայքարում է ընկերությանը տիրանալու համար, նրա ապագան տեսնում է յուրովի։ Մասնագետները նշում են, որ սերիալի հեղինակները չեն վերստեղծել Գինեսների ընտանիքի վավերական պատմությունը, այլ ներկայացրել են, թե ինչպիսին էր Իռլանդիան 1800-ականներին։ Գինեսների ընկերությունն այս դեպքում ոչ միայն հաջողակ ընտանեկան բիզնես էր, այլեւ տնտեսական փոփոխությունների խորհրդանիշ։ Արդյունաբերականացումը փոխում է հասարակությունը, ստեղծում հանրային նոր խավեր, միաժամանակ՝ ավելի ուժգնացնում սոցիալական անհավասարությունը եւ տարբերությունները՝ տարբեր աստիճանների վրա կանգնածների միջեւ։ Սերիալում նաեւ մի նուրբ ասելիք կա․ ցանկացած խոշոր բիզնեսի հետեւում բարդ մարդկային որոշումներ են, քաղաքական կոմպրոմիսներն ու անձնական ողբերգությունները։ Սերիալում կերպարների հերոսացում, որպես այդպիսին, չկա։ Գործնականում կերպարներից յուրաքանչյուրը ե՛ւ դրական, ե՛ւ բացասական էմոցիաներ է առաջացնում։ Ամեն բան բազմաշերտ է ու բալանսավորում պահանջող, որ մի պահ թվում է, թե խոսքը ոչ թե սերիալի մասին է, այլ մեր օրերում ծավալվող իրական զարգացումների։ Սա, ի վերջո, այն նախագծերից է, որը դիտելու համար անհրաժեշտ են ուշադրություն եւ համբերատարություն, ու այն, անխոս, կհետաքրքրի ինտելեկտուալ կինոնախագծերի բոլոր սիրահարներին։