Ինչ սպասել փողոցից
Mon, 06 Jul 2026 11:36:58 +0400
Քաղաքագետ Սուրեն Սուրենյանցը լրագրողների հետ զրույցում կարծիք է հայտնել, որ եթե ընտրական համակարգի նկատմամբ հասարակության վստահությունը շարունակաբար նվազում է, ապա դա կարող է լուրջ քաղաքական հետևանքներ ունենալ։ Նրա խոսքով՝ նման իրավիճակներում, երբ քաղաքական գործիչները հայտնվում են կոշտ և անընդունելի թիրախավորման տակ, հասարակության տրամադրությունները աստիճանաբար կարող են դառնալ ավելի արմատական։
Սուրենյանցը նշել է, որ այս զարգացումները կարող են հանգեցնել նոր, ավելի կտրուկ ընդդիմադիր հարթակի ձևավորմանը, որը հնարավոր է չբացառի նաև հեղափոխական լուծումների տարբերակը։
Նա հավելել է, որ եթե արագ փոփոխությունների կամ հեղափոխական սցենարի հնարավորություն չկա, ապա միայն պատգամավորական մանդատներից հրաժարվելը բավարար լուծում չի կարող լինել։ Նրա համոզմամբ՝ անհրաժեշտ է համադրել խորհրդարանական և փողոցային պայքարը, սակայն հիմնական քաղաքական գործընթացների կենտրոնը պետք է լինի փողոցը։
Քաղաքագետը նաև ընդգծել է, որ առանց փողոցային ակտիվության՝ Ազգային ժողովում կարող են կրկնվել իրավիճակներ, որոնք նման են Երևանի ավագանու վերջին նիստերի ընթացքում արձանագրված լարվածություններին։