Ինչ է առաջարկում Ռուսաստանը Հայաստանին՝ ատոմակայանի կառուցման հարցով
Mon, 06 Jul 2026 18:00:32 +0400
«Ռոսատոմը» առաջարկում է Հայաստանում կառուցել մեծ կամ միջին հզորության ատոմակայան՝ երկրի էլեկտրաէներգիայի կարիքները տասնամյակներ շարունակ բավարարելու համար, ասել է պետական կորպորացիայի գործադիր տնօրեն Ալեքսեյ Լիխաչովը։
Նրա խոսքով՝ Հայաստանի էլեկտրաէներգիայի 30%-ը ներկայումս արտադրվում է ատոմային էներգիայի միջոցով։ Ավելին, Լիխաչովը չի բացառել, որ առաջիկա տասնամյակներում Հայաստանի էլեկտրաէներգիայի դեֆիցիտը կարող է հասնել մեկ գիգավատի։
«Մենք պետք է պատրաստ լինենք դրան։ Եվ մեր պատասխանն է՝ մեծ կամ միջին հզորության կայան, մեկ կամ երկու բլոկ, որը կբավարարի առաջիկա տասնամյակների էներգիայի պակասը», – լրագրողներին ասել է Լիխաչովը։
Ավելին, նա վստահություն է հայտնել, որ ատոմային արդյունաբերության առկայությունը բարձրորակ տնտեսության և արդյունաբերության նշան է։