«Հրապարակ». Երբ Ծառուկյանը դուրս եկավ տնից, թույլ չտվեցին, որ դուստրերը մոտենան հորը
Wed, 08 Jul 2026 10:45:41 +0400
«Հրապարակի» զրուցակիցը «Բարգավաճ Հայաստան» կուսակցության անդամ Լուիզա Սարգսյանն է:
– Երկուշաբթի երեկոյան ոչ միայն Գագիկ Ծառուկյանին ձերբակալեցին, այլեւ նրան պատկանող կենդանիներին քնեցրին եւ տարան Երեւանի կենդանաբանական այգի: Քննչական կոմիտեն ասաց, որ կենդանիներն իրեղեն ապացույց են համարվում, իսկ հանրությունը շոկահարվել է այն փաստից, որ Նիկոլ Փաշինյանն անգամ կենդանիներից է վրեժ լուծում: Ի դեպ, երեկ հայտնի դարձավ, որ առյուծներից մեկը քնից չի արթնացել: Ուզում ենք հասկանալ` այդ կենդանիներն օրինակա՞ն են, թե՞ ոչ: Ի՞նչ հիմքով են պահվել դրանք Ծառուկյանի տանը, եւ ի՞նչ հիմքով են կենդանիներին քնեցրել ու առեւանգել:
– Ամեն ինչն էլ օրինական է եղել, կենդանիները նույնպես օրինական են եղել` թղթաբանությամբ եւ ամեն ինչով: Ուղղակի աղմուկ բարձրացրին, համացանցը սկսեց քննարկել նաեւ այդ հարցը, սակայն ամենացավալի փաստերից մեկն այն է, որ Հայաստանում այսօր տասը հազար մարդ արթնացավ եւ աշխատանքի չգնաց: Մարդիկ չգիտեն, թե ինչ է լինելու իրենց վիճակը: Մարդիկ գործազուրկ դարձան: Գագիկ Ծառուկյանին պատկանող բոլոր գործարանները փակված են, մի խոսքով` ամենուր ապօրինություններ են: Ինչ վերաբերում է կենդանիներին, կենդանիները շատ ճիշտ պայմաններում են պահվել, ոչ մի խնդիր չի եղել նաեւ այս հարցում:
– Այդ դեպքում ո՞րն է կենդանիներին թիրախ դարձնելու պատճառը: Անգամ կենդանիների խրտվիլակներն առգրավվեցին:
– Այս ամբողջ պրոցեսի ժամանակ այնքան շատ են թիրախավորումները եղել, որ դրանք հաշվել հնարավոր չէ: Թիրախավորվում են բոլորը եւ ամեն ինչ: Քարոզարշավի ժամանակ Գագիկ Ծառուկյանը խոսում էր ավելի լավ Հայաստանի մասին, ասում էր, որ պետք է մեգանախագծեր կյանքի կոչել, որ պետք է նոր աշխատատեղեր ավելացնել, հայ մարդու համար պետք է բարեկեցիկ կյանք ապահովել, որպեսզի մարդիկ լավ ապրեն, լավ վարձատրվեն, ընտանիք պահեն, այսօր փաստացի այս ամենի փոխարեն տասը հազար քաղաքացի գործազուրկ է մնացել: Մենք դատարանի բակում կանգնած ենք, մեզ հետ են նաեւ բազմաթիվ գործազուրկ դարձած քաղաքացիներ, քիչ առաջ մի քանի տղամարդ պատմում էին, որ ունեն վեց-յոթ անձից բաղկացած մեծ ընտանիք, եւ իրենք են ընտանիքի միակ կերակրողը, ընտանիքին կերակրել են գործարանում աշխատելով, սակայն այսօր չունեն աշխատանք եւ կանգնել են փաստի առաջ:
– Օրինակ, նույն «Մուլտի վելնես»-ում մարդիկ աբոնեմենտներ են վերցրել, վճարել են մեծ գումարներ, հիմա մարդկանց զրկում են իրենց վճարած գումարի դիմաց մարզվելուց: Կամ` Օլիմպավանում:
– Ոչ միայն «Մուլտի վելնես»-ում, այլեւ` Օլիմպավանում տարբեր սպորտսմեններ պարապելիս են եղել, ի դեպ` խոսքը ոչ միայն հայ սպորտսմենների մասին է, այլեւ` օտարազգի: Ի վերջո, մարդիկ օլիմպիական մրցումների են պատրաստվում, մարզվում են եւ այլն, սա արդեն միջազգային մակարդակի խնդիր է: «Մուլտի վելնես»-ում մարզվելու համար էլ մարդիկ գումարներ են վճարել` մեկ-երկու տարվա համար, որպեսզի մարզվեն: Ես չեմ կարող իրավապահների այս գործելաոճին գնահատական տալու համար խոսքեր գտնել:
– Ի դեպ, խուզարկության ժամանակ Գագիկ Ծառուկյանի դուստրերին թույլ չէին տալիս մտնել հայրական առանձնատուն: Ինչո՞ւ, ի՞նչ հիմքով:
– Ծառուկյանի դուստրերը երեկ ամբողջ խուզարկության ընթացքում` 12 ժամ մեզ հետ միասին դրսում էին: Քանի անգամ մոտեցանք, խնդրեցինք, ասելով, որ դա իրենց հայրական տունն է, սակայն ոչ մի կերպ նրանց ներս մտնել չթողեցին: Անգամ այն ժամանակ, երբ Գագիկ Ծառուկյանը դուրս եկավ առանձնատնից, թույլ չտվեցին, որ դուստրերը մոտենան իրենց հորը: Պատճառաբանություն չկար, չի կարելի, եւ վերջ: