Թուրքիայի փոխնախագահը կրկին անդրադարձել է Հայաստանի հետ հարաբերությունների կարգավորման հարցին
Wed, 08 Jul 2026 13:30:00 +0400
Թուրքիայի փոխնախագահ Ջևդեթ Յըլմազը Թուրքիայում անցկացվող ՆԱՏՕ-ի գագաթնաժողովի շրջանակներում պատասխանել է թուրքական «Haberler.com» լրատվամիջոցի հարցերին։
Նա հայտնել է, թե ինչ հարցեր են քննարկվելու Թուրքիայի ու ԱՄՆ նախագահների հանդիպման ընթացքում, գրում է Ermenihaber-ը։
«Քննարկվելու են բազմաթիվ տարածաշրջանային, գլոբալ և երկկողմ հարցեր։ Հարավային Կովկասը շատ կարևոր է։ Հայաստանի և Ադրբեջանի խնդիրները զգալիորեն նվազել են։ Մենք այժմ շատ մոտ ենք խաղաղությանը (մոտ կետում ենք)։ Մյուս կողմից, կա «Զանգեզուրի միջանցքը»։ Դրա բացումը ամրապնդում է Թուրքիայի և Կենտրոնական Ասիայի միջև կապը և Միջին միջանցքը՝ Չինաստանից մինչև Եվրոպա։ Մենք բոլորս դա ենք ցանկանում, և Թուրքիան մեծ ջանք է գործադրում»,- նշել է Յըլմազը։
Նրա խոսքով, Թուրքիան ջանում է, որպեսզի և՛ խաղաղություն լինի, և՛ Թուրքիայի ու Հայաստանի միջև լիակատար կարգավորում լինի։ Այս հարցում ԱՄՆ-ն ու Թուրքիան նմանատիպ տեսակետ ունեն։
«Կարծում եմ՝ նորմալ է, որ սա մեր քննարկումների մաս կազմի»,-նշել է Թուրքիայի փոխնախագահը։