2025-ին 3 հազար տոննա արտահանել են, այս տարի դեռ պարզ չի
Wed, 08 Jul 2026 21:15:04 +0400
Բերդ համայնքի սահմանամերձ Չինարի գյուղի այգեգործներն անհանգիստ են։ 15-20 օրից կսկսվի թզի առաջին բերքահավաքը, սակայն չինարեցիները չգիտեն՝ բերքի մթերում, ՌԴ արտահանում կլինի՞, թե ոչ։
Չինարի համայնքի նախկին ղեկավար, Բերդի համայնքապետարանի մասնագետ Սամվել Սաղոյանը մեզ հայտնեց, որ նախկինում թզի մեծաքանակ գնումը, արտահանումն իրականացրել են մի քանի երեւանցի գործարարներ եւ 2 վրացահայ գործարար, որոնցից մեկը Չինարի գյուղի թոռ է։ 2025 թվականին Չինարիից արտահանվել է 700 տոննա, իսկ սահմանամերձ մյուս գյուղերի՝ Չորաթանի, Այգեձորի, Արծվաբերդի հետ միասին առաքվել է 3 հազար տոննա թուզ։
Բերքը առաքվել է Կրասնոդար, Սոչի, Մոսկվա։ Անցյալ տարի գյուղացիներից թզի կիլոգրամը 200 դրամով են ընդունել, իսկ նախկինում, երբ ռուսական ռուբլու փոխարժեքը բարձր է եղել, թզի գինը եղել է 400-500, անգամ՝ 1000 դրամ։ Ս․ Սողոյանն ասաց, որ եթե այս տարի թզի արտահանում չլինի, սահմանամերձ գոտւ բնակիչների վիճակը ծանր է լինելու։