ՔՊ-ում թեժ մարտեր են մղվում խորհրդարանի մշտական հանձնաժողովների նախագահների պաշտոնների համար։ Չնայած վերնախավը պարտիզանական պահվածք է դրսեւորում՝ չգաղտնազերծելով, թե ովքեր եւ որ հանձնաժողովի նախագահի համար են իրենց թեկնածություններն առաջադրել, սակայն թիմում ոմանք տեղյակ են թեժ մարտերից։

Նախ հիշեցնենք, որ ԱԺ 12 մշտական հանձնաժողովներից 9-ը, Դոնթի բանաձեւով, բաժին է հասնում ՔՊ-ին, 3-ը` «Ուժեղ Հայաստանին», իսկ «Հայաստան» դաշինքին հանձնաժողովի նախագահություն չի հասնում: Արդյո՞ք «ուժեղները», 2021-ին «Հայաստան»-ցիների օրինակով, մեկ հանձնաժողովի նախագահի պաշտոն կզիջեն գործընկերներին, դեռ պարզ չէ։
Սակայն ՔՊ-ական մեր աղ­բյուր­ներն ասում են, որ իշխանությունը 3 հանձնաժողովներից մեկի նախագահությունը` որեւէ ազդեցիկ հանձնաժողովում, զիջի ընդդիմադիր գործընկերներին: Հնարավոր է դա լինի Ժոկոյի դստեր՝ Ծովինար Վարդանյանի ղեկավարած ֆինանսավարկային հարցերի մշտական հանձնաժողովի նախագահի կամ տարածաշրջանային եւ եվրասիական ինտեգրման հարցերի մշտական հանձնաժողովի նախագահի պաշտոնը: Երկրորդը, ըստ ամենայնի, կլինի մարդու իրավունքների պաշտպանության հանձնաժողովը, որը նախորդ խորհրդարանում Ռոբերտ Քոչարյանի դաշինքը մեծահոգաբար զիջեց «Պատիվ ունեմ»-ին, եւ այն ղեկավարում էր Թագուհի Թովմասյանը, մինչեւ որ նրան զրկեցին նախագահի աթոռից եւ հանձնաժողովը հանձնեցին ազգությամբ եզդի Ռուստամ Բաքոյանին: Երրորդը գուցե լինի աշխատանքի եւ սոցիալական հարցերի հանձնաժողովը։

Գալով նրան, թե որ հանձնաժողովի նախագահի համար են թեժ մարտեր մղվում, մեր աղբյուրների փոխանցմամբ` կրթության, գիտության, մշակույթի հարցերով հանձնաժողովի նախագահի պաշտոնի համար պայքարում է երբեմնի կապտամազիկ Թագուհի Ղազարյանը, որն իրեն գրեթե ԿԳՄՍ նախարար է երեւակայում եւ կարծում է՝ եթե իրեն նախարար չեն նշանակում, առնվազն պետք է գլխադասային հանձնաժողովը ղեկավարի: Նա վերջին տարիներին գրեթե անճանաչելի իմիջափոխվել է` հաղորդումներ ու փոթքաստներ է վարում։ Այս հանձնաժողովը ղեկավարում էր Սիսակ Գաբրիելյանը, որը, սակայն, այժմ անտեր ու անտանիք է մնացել, որովհետեւ ջերմ հարաբերություններ ուներ Փաշինյանի աներձագ Հրաչ Հակոբյանի հետ, որն այս խորհրդարանում չկա, ինչպես նաեւ` Ալեն Սիմոնյանի թիմից էր համարվում։ ՔՊ-ում վստահ են, որ նրան այս անգամ բախտը չի ժպտա, գուցե Թագուհուն կարգեն նախագահ։

Եվրաինտեգրման կամ արտաքին հարաբերությունների հանձնաժողովի նախագահ են դիտարկում Մարիա Կարապետյանին, որը ցուցակում հետին հորիզոնականներն է զբաղեցնում, բայց եթե մի քանի տասնյակ մարդ տեղափոխվի գործադիր, հերթը նրան էլ կհասնի։

Պաշտպանության հանձնաժողովի նախագահի պաշտոնին, ըստ մեր աղբյուրի, հավակնում են Արմեն Խաչատրյանը, Հակոբ Սիմիդյանը, Վիլեն Գաբրիելյանը: Իսկ Անդրանիկ Քոչարյանը, մեր տեղեկություններով, չի առաջադրվելու։ Ըստ ամենայնի, ՔՊ վարչությունն այս պաշտոնում կընտրի Արմեն Խաչատրյանին, դրանով նաեւ կփակի նրա` գործադիր տեղափոխվելու եւ ՆԳ նախարար նշանակվելու հավակնությունները։

Գրեթե որոշված է, որ պետաիրավական հարցերով մշտական հանձնաժողովը կշարունակի ղեկավարել Արուսյակ Ջուլհակյանը, նրան ԱԺ փոխնախագահի պաշտոնին չեն նշանակել հենց այս խոստումով: Ասել են` հանձնաժողովի ղեկավարի հարմար թեկնածու չունենք։ Խոսում են նաեւ, որ տարածքային, տնտեսական հանձնաժողովներն էլ, համապատասխանաբար, կշարունակեն ղեկավարել Փաշինյանի քավորեղբայր Վահե Ղալումյանը եւ Բաբկեն Թունյանը։ Արդեն գրել ենք, որ ՔՊ-ում խուլ դժգոհություն կա, որ պառլամենտական կառավարման համակարգում խորհրդարանականները զրկված են որոշումներ կայացնելու իրավունքից` անգամ հանձնաժողովների նախագահներին ՔՊ վարչությունը, այսինքն՝ Փաշինյանն է ընտրում։