Ողբերգական դեպք՝ Նոյեմբերյանում
Fri, 10 Jul 2026 15:25:20 +0400
Նոյեմբերյան համայնքի ղեկավար Արսեն Աղաբաբյանը և համայնքապետարանի ողջ աշխատակազմը խոր վշտով ցավակցում են մեր համայնքի երիտասարդ բնակչի անժամանակ ու ողբերգական մահվան կապակցությամբ։
Այս անչափ ծանր պահին մեր անկեղծ զորակցությունն ենք հայտնում հանգուցյալի ծնողներին, ընտանիքի անդամներին, հարազատներին, ընկերներին և բոլոր նրանց, ովքեր կիսում են այս մեծ կորուստը։
Երիտասարդ կյանքի վաղաժամ ընդհատումը անդառնալի ցավ է ողջ համայնքի համար։ Աղոթում ենք հանգուցյալի հոգու խաղաղության համար, իսկ հարազատներին մաղթում ուժ ու տոկունություն՝ այս ծանր հարվածը կրելու համար։
Տեղեկացնում ենք, որ Կողբ բնակավայրում նախապես պլանավորված Վարդավառի ավանդական միջոցառման շրջանակներում բազմաթիվ հյուրեր և պատվիրակություններ արդեն իսկ ժամանել են համայնք, ինչի պատճառով տեխնիկապես հնարավոր չէ ամբողջությամբ չեղարկել տոնակատարությունը։
Հայցում ենք հանգուցյալի ընտանիքի, հարազատների և մեր բոլոր համաքաղաքացիների ներողամտությունն ու ըմբռնումը։ Եվս մեկ անգամ խորին ցավակցություն ենք հայտնում այս անդառնալի կորստի համար։
Նոյեմբերյանի համայնքապետարան
Հիշեցնենք՝ մենք գրել էինք, որ հուլիսի 9-ին, ժամը մոտավորապես 17․ 30-ի սահմաններում Նոյեմբերյան համայնքի Ոսկեպար գյուղում մի երիտասարդ ցանկացել է Ոսկեպար գետում լողանալ:
Նա բարձունքից գետն է ցատկել եւ ժայռին բախվել` գլխի վնասվածք ստանալով: 21-ամյա երիտասարդի վնասվածքը մահացու է եղել։ Նա Նոյեմբերյան համայնքի Կողբ գյուղի բնակիչ է։ Երիտասարդը մեկ տարի առաջ էր վերադարձել պարտադիր զինծառայությունից։