Ոմանք զարմանում են, թե ինչու Գագիկ Ծառուկյանի համախոհները, թիմակիցները, նրան պատկանող հիմնարկությունների աշխատողները կազմակերպված դուրս չեն գալիս փողոց, բողոքի ակցիաներ չեն անում: Բացի այն, որ Ծառուկյանի ամբողջ թիմի նկատմամբ տոտալ հոգեբանական ճնշումներ ու սպառնալիքներ են գործադրվում այս օրերին, որ ոչ ոք չհամարձակվի բողոքել, մի հանգամանք էլ կա, որը խանգարում է կազմակերպված պայքարին:

Բանն այն է, որ Ծառուկյանի թիմում, որպես կանոն, կազմակերպչական աշխատանքներն իրականացրել է Հրաչյա Ռոստոմյանը: Սակայն Սպորտի եւ երիտասարդության հարցերի նախկին նախարար, Հայաստանի ազգային օլիմպիական կոմիտեի գլխավոր քարտուղար Հրաչյա Ռոստոմյանը շաբաթներ առաջ մեկնել է Հայաստանից եւ դեռ չի վերադարձել: Նրան ուղիղ տեքստով զգուշացրել են, որ իր նկատմամբ եւս քրեական հետապնդում են սկսելու: Թերեւս դա է բացակայության պատճառը: Մենք փորձեցինք կապվել Ռոստոմյանի հետ, սակայն նա չպատասխանեց մեր զանգերին: Մտերիմներն ասացին` հանրապետությունում չէ: