Քարլի Սայմոնը բացահայտել է ՝ ինչ հիվանդություն են հայտնաբերել իր մոտ
Wed, 29 Jul 2026 21:15:32 +0400
Ամերիկացի հայտնի երգչուհի և երգահան Քարլի Սայմոնը հայտնել է, որ իր մոտ ախտորոշվել է Պարկինսոնի հիվանդություն։ 83-ամյա արտիստի խոսքով՝ այժմ նա փորձում է հարմարվել հիվանդությանը, որը երբեմն չափազանց ծանր է լինում։
Սայմոնը պատմել է, որ հիվանդության ընթացքն անկանխատեսելի է։ Որոշ օրերին իրեն այնքան ուժասպառ է զգում, որ նույնիսկ դժվարանում է շարժվել, մինչդեռ այլ օրերին կարողանում է աշխատել, ստեղծագործել և իրեն լավ զգալ։ Նրա խոսքով՝ առողջական խնդիրները չեն ստիպել հրաժարվել ակտիվ կյանքից, և նա շարունակում է զբաղվել իր աշխատանքով։
Երգչուհին նաև հայտնել է, որ վերջերս վիրահատության է ենթարկվել՝ դեմքի վրա առաջացած քաղցկեղային գոյացությունը հեռացնելու նպատակով։ Նա խոստովանել է, որ արտաքինի փոփոխությունների պատճառով այժմ ավելի անհարմարավետ է զգում հանրության առաջ հայտնվելիս։
Սայմոնի խոսքով՝ սկզբում կարծում էր, թե շարժունակության խնդիրները պայմանավորված են ծնկների և կոնքի հոդերի արթրիտով։ Նա երեք վիրահատություն է տարել, սակայն դրանցից հետո ակնկալվող բարելավումը չի եղել։ Ժամանակի ընթացքում նրա համար դժվարացել է կանգնելը, իսկ ավելի ուշ՝ նաև առանց զգալի օգնության քայլելը։
Երգչուհին ներկայումս ստանում է դեղորայքային բուժում և անցնում է թերապիա։ Նա նշել է նաև, որ հիվանդությունը ոչ միայն ֆիզիկական, այլև հոգեբանական ծանր ազդեցություն է ունեցել՝ առաջացնելով անհանգստության, դեպրեսիայի և անտարբերության շրջաններ։