Իսպանական Մելիլիայում Մարոկկոյից եկած միգրանտները շարունակվում են գրոհել սահմանը։ Իսպանական Սեուտա անկլավ թափանցած որոշ միգրանտներ պնդում են, թե մարոկկացի ոստիկաններն իբր օգնել են իրենց հատել սահմանը։ Այս մասին գրում է ամերիկյան New York Times թերթը։

Պարբերականը մեջբերում է միգրանտ Յուսեֆ Ալաուիի խոսքերը, որը պատմել է՝ երբ իրենց խումբը մոտենում էր Իսպանիայի հետ սահմանին, մարոկկացի ոստիկաններն իբր ցույց են տվել ճիշտ ուղղությունը՝ գոռալով «շարժվեք այն կողմ, շարժվեք այն կողմ»։

Մեկ այլ միգրանտ՝ Մոհամմեդ Ահմիդխոն, պարբերականին հայտնել է, որ միգրանտների հոսքի մասին իմացել է սոցցանցերից։ Ընդ որում, նրա խոսքով, երբ ինքը մոտենում էր Իսպանիայի հետ սահմանին, մարոկկացի իրավապահներն իբր ասել են իրեն. «Գնա Իսպանիա»։ Հետագայում Ահմիդխոն վերադարձել է Մարոկկո, քանի որ Սեուտայում չի եղել ոչ սնունդ, ոչ ջուր, ոչ էլ գիշերելու տեղ։

Cadena SER ռադիոկայանի հաղորդմամբ՝ Մարոկկոյից իսպանական Սեուտա թափանցելու փորձերի հետևանքով զոհված միգրանտների թիվը հասել է 61-ի, սա ռեկորդային ցուցանիշ է։ Իրավապահները շարունակում են մարմիններ գտնել սահմանի մոտ գտնվող Տարախալ լողափին, ուստի զոհերի թիվը դեռ կավելանա։

Հուլիսի 30-ին հազարավոր երիտասարդ մարոկկացիներ հավաքվել են Մարոկկոյի և իսպանական Սեուտայի (իսպանական էքսկլավ, որը ցամաքից շրջապատված է Մարոկկոյի տարածքով- խմբ.) սահմանին։ Իսպանիայի ներքին գործերի նախարարության և տեղական իշխանությունների վերջին տվյալներով՝ մեկ օրում Սեուտա է անցել 40,000-ից մինչև 60,000 անօրինական միգրանտ։ Իսպանիայի իշխանությունները շտապ կարգով ամրապնդել են սահմանը ոստիկանության և զինվորականների լրացուցիչ ուժերով՝ իրավիճակը վերահսկողության տակ պահելու համար։