Ադրբեջանում բանկային համակարգում հաճախորդների իրավունքների պաշտպանի ինստիտուտ կստեղծվի։ Համաձայն ադրբեջանական Կենտրոնական բանկի վարչության որոշման, փոփոխություն է կատարվել «Բանկերի կորպորատիվ կառավարման չափորոշիչներում»։

Ըստ այդմ, բանկերը պարտավոր են ստեղծելու անկախ կառույց՝ հաճախորդների իրավունքների պաշտպանի հաստիք, որը կուսումնասիրի հաճախորդների գանգատները, բողոքներն ու դժգոհությունները։ Մինչ այժմ՝ բանկերը միայն համապատասխան ներքին կանոնակարգումներով էին նմանատիպ հարցերը լուծում, իսկ այժմ արդեն՝ պետական մակարդակում ստեղծվում է հատուկ կառույց, որը կզբաղվի բանկային համակարգում հաճախորդների իրավունքների պաշտպանությամբ։ Ընդ որում՝ հաճախորդների իրավունքների պաշտպանը հետեւելու է նաեւ հաճախորդների գանգատների բողոքների ու դժգոհությունների հետ կապված՝ կայացված ներքին որոշումների կատարմանը։ Նոր կառույցը կհամագործակցի Կենտրոնական բանկի հետ եւ կմասնակցի բնակչության ֆինանսական գրագիտության մակարդակի բարձրացմանը միտված միջոցառումներին։

Նաեւ՝ նախատեսվում է որոշակիորեն խստացնել բանկային ոլորտի էթիկական կանոնները, հատկապես նրանք, որոնց վերաբերվում են թափանցիկությանը, բարեխղճությանը հաճախորդների հանդեպ բարեկիրթ եւ արդարացի, հավասար պայմանների պահպանմամբ մոտեցմանը եւ այլն։