Մոսկվան և Երևանը քննարկում են Կապանում Ռուսաստանի գլխավոր հյուպատոսություն և Վլադիկավկազում Հայաստանի հյուպատոսական բաժին բացելու հարցը։ Այս մասին ՌԻԱ Նովոստիին հայտնել է Վլադիկավկազում ՌԴ ԱԳՆ ներկայացուցչության ղեկավար Բագիր Մամիևը։

​«Այսօրվա դրությամբ տվյալ հարցը (Վլադիկավկազում Հայաստանի հյուպատոսական բաժանմունքի բացման` խմբ.), ինչպես և Կապանում Ռուսաստանի Գլխավոր հյուպատոսության բացման հարցը երկկողմ օրակարգից հանված չէ, բայց որոշակի ժամկետների մասին խոսելը դեռ վաղաժամ է»,-ասել է Մամիևը։

Ընդ որում, նա ընդգծել է, որ Վլադիկավկազում ԱԳՆ ներկայացուցչությունը կայուն աշխատանքային կապ է հաստատել Դոնի Ռոստովում Հայաստանի գլխավոր հյուպատոսության հետ, այդ թվում՝ «Վերին Լարս» անցակետում, հայաստանցի փոխադրողների հետ կապված։ «Վերին Լարսը» Ռուսաստանը Վրաստանի և Հայաստանի հետ կապող միակ ցամաքային երթուղին է։