Զոհեր և տուժածներ կան․ հզոր երկրաշարժ է եղել
Mon, 10 Aug 2026 23:00:28 +0400
Այսօր Կոլումբիայում 7,4 մագնիտուդով երկրաշարժ է գրանցվել։ Տեղեկությունը հայտնում է երկրի սեյսմոլոգիական ծառայությունը:
Կոլումբիայի երկրաբանական ծառայության տվյալներով՝ երկրաշարժի էպիկենտրոնը գտնվում է Չոկո դեպարտամենտի Սան Խոսե դել Պալմար քաղաքի շրջանում։
Արդեն տեղեկություններ կան զոհերի և տուժածների մասին։ Մասնավորապես Մանիսալեսի քաղաքապետ Խորխե Ռոխասը հայտնել է, որ քաղաքում 12 մարդ է մահացել։
Նրա խոսքով՝ քաղաքում ավելի քան 10 շենք ամբողջությամբ ավերվել է, ավելի քան 20-ը` մասնակի: Տուժել է երկու հիվանդանոց, վնասվել են նաև որոշ դպրոցներ և եկեղեցիներ։
Շենքեր են վնասվել դեպարտամենտի մայրաքաղաք Կիբդո քաղաքում։ Փլատակներում կարող են մարդիկ լինել։
Կոլումբիայի արևմուտքում վնասվել է վեց օդանավակայան, որոնք հիմա փակ են։