Հայաստանը մինչև այս տարվա դեկտեմբեր պետք է որոշի՝ համազգային հանրաքվե անցկացնի Եվրամիությանը միանալու համար կամ պահպանի Եվրասիական տնտեսական միության (ԵԱՏՄ) անդամակցությունը: Այս հայտարարությունն արել է ՌԴ փոխարտգործնախարար Միխայիլ Գալուզինը ՏԱՍՍ-ին տված հարցազրույցում:

Ավելի վաղ հաղորդվել էր, որ Երևանի նկատմամբ հնարավոր հետագա քայլերի հարցը կքննարկվի դեկտեմբերին ԵԱՏՄ ղեկավարների հանդիպման ժամանակ:

«Ակնհայտ է, որ եթե հանրաքվեի վերաբերյալ կոչը մինչ այդ լսելի չդառնա, առաջնորդներն այդ փաստը հաշվի կառնեն հետագա համապատասխան համատեղ քայլերը որոշելիս», – նշել է Գալուզինը:

Նա հիշեցրել է, որ Հայաստանի եվրոպական ձգտումների վերաբերյալ Ռուսաստանի, Բելառուսի, Ղազախստանի և Ղրղզստանի նախագահների` մայիսի 29-ի համատեղ հայտարարության մեջ խոսվում է ԵՄ-ին միանալու կամ ԵԱՏՄ-ում մնալու վերաբերյալ համազգային հանրաքվե անցկացնելու անհրաժեշտության մասին, բայց կոնկրետ ամսաթիվ չի նշվում։

«Միևնույն ժամանակ արդեն հայտարարվել է, որ այս հարցը կրկին կքննարկվի Եվրասիական տնտեսական բարձրագույն խորհրդի դեկտեմբերյան նիստի ընթացքում, երբ պետությունների ղեկավարները պետք է զեկույց ներկայացնեն Հայաստանի նկատմամբ ԵԱՏՄ–ի մասին 2014 թվականի մայիսի 29 – ի պայմանագրի գործողությունը կասեցնելու հնարավոր հետևանքների մասին», – ասել է ՌԴ ԱԳ փոխնախարարը։

Հավելենք, որ այս տարվա օգոստոսի 7-ին Ղրղզստանում ԵԱՏՄ միջկառավարական խորհրդի նիստում ՀՀ վարչապետ Նիկոլ Փաշինյանն իր ելույթում հայտարարեց, որ Հայաստանն այս պահին չի կարող ընտրություն կատարել ԵՄ–ի և ԵԱՏՄ–ի միջև։ Նրա խոսքով` հանրաքվեի անցկացումը կլինի անբովանդակ և կնշանակի, որ իշխանությունը քաղաքացիներից ակնկալում է մի հարցի պատասխան, որն այս պահին գոյություն չունի։