Այսօր Անվտանգության խորհրդի քարտուղար Արմեն Գրիգորյանը հրաժեշտ տվեց պաշտոնին։ Նա այս պաշտոնին նշանակվել էր 2018թ-ին։ Կոռուպցիայի կանխարգելման հանձնաժողովից տեղեկանում ենք, որ Գրիգորյանը պաշտոնավարման տարիներին բնակարան է ձեռք բերել։ Այն գտնվում է Արաբկիր վարչական շրջանում, գնել է 2020թ․ հուլիսին։ Գրիգորյանը ունի նաև Տոյոտա մակնիշի ավտոմեքենա՝ 2020թ․ արտադրության, որը գնել է 2023թ-ի հունիսին։ Տարեվերջին նրա բանկային հաշիվներին եղել է 7 մլն 797 հազար 118 դրամ գումար։ Եկամուտները կազմել են 36 մլն 542 հազար 342 դրամ, որից 31 մլն 22 հազար 387 դրամը գոյացել է աշխատավարձից, իսկ 5 մլն 519 հազար 955 դրամը՝ եկամտահարկի վերադարձից։ Նրա հիփոթեքային վարկի մնացորդը կազմել է 44 մլն 349 հազար դրամ։ Տարվա ընթացքում վարկի մարմանն ուղղված 8.6 մլն դրամ վճարում է արել։

Գրիգորյանի կինը՝ Մանե Մինասյանը աշատում է «Վորլդ Վիժն Ինթերնեյշնլ» միջազգային բարեգործական կազմակերպության հայաստանյան մասնաճյուղում, որպես հասարակայնության հետ կապերի և հաղորդակցության բաժնի համակարգող։ Տարեվերջին նա ունեցել է 27 մլն դրամ վարկ։ Նրա բանկային հաշիվների մնացորդը կազմել է 2 մլն 83 հազար 686 դրամ, իսկ եկամուտները կազմել են 8 մլն 349 հազար 921 դրամ, որից 6 մլն 779 հազար 829 դրամը գոյացել է աշխատավարձից, իսկ 1 մլն 570 հազար 92 դրամը՝ եկամտահարկի վերադարձից։