«Հրապարակ»․ Բանակում գողությունների համար ո՞վ պետք է պատասխան տա
Sat, 15 Aug 2026 08:05:48 +0400
Բանակում ամենուր բարձիթողի վիճակ է, չնայած օրերս ինքնասպանությունների հաճախացած դեպքերի համար «ժերտվա տվեցին» ռազմական ոստիկանության պետին, սակայն դա կարգուկանոն չի հաստատելու համակարգում, որովհետեւ ծանր վիճակ է: Տեղեկացանք, որ օրեր առաջ Էջմիածնի քիմիկների զորամասում հայտնաբերվել է վառելիքի հետ կապված հերթական խախտումը։
Հիշեցնենք, որ անցած տարվա հոկտեմբերին այս զորամասում հայտնաբերվել էր վառելիքի գողության դեպք, սակայն ոչ մի բարձրաստիճան զինվորական պատասխանատվություն չէր կրել։ Դատարանի առաջ կանգնել են միայն զորամասի պահեստապետն ու միջին օղակի մի սպա։ Այս անգամ բենզինի հետ դիզվառելիք են խառնել՝ հնարավոր պակասորդը թերեւս լրացնելու համար։
Ըստ մեր տեղեկությունների, բենզինով լիցքավորված մեքենաները «խոդի չեն ընկել», ու այդպես բացահայտվել է յուրացումը։ Ասում են նաեւ, որ զորամասի հրամանատար Յուրի Դանիելյանը ջերմ հարաբերություններ ունի զորամասի աշխատանքները վերահսկող, ՊՆ բարձրաստիճան սպա Համլետ Հարությունյանի հետ, ինչի արդյունքում էլ այս զորամասում արձանագրված խախտումները ջրի երես դուրս չեն գալիս։