Նախարարության անվանումների այս աճպարարությունը ունի մեկ նպատակ՝ տարալուծել բուն իմաստները․ Բադալյան
Thu, 27 Aug 2026 23:15:22 +0400
Արտաքին քաղաքական գերատեսչության աշխատանքը իհարկե ենթադրում է նաեւ տնտեսական օրակարգեր, որովհետեւ միջազգային քաղաքականությունը նաեւ տնտեսություն է։ Այստեղ քննարկելու հարց էլ չկա։ Այս մասին տելեգրամյան իր էջում գրել է քաղաքական մեկնաբան Հակոբ Բադալյանը։
«Բայց, աշխարհի որեւէ անգամ ամենատնտեսական արտաքին քաղաքականություն վարող երկիրը իր արտգործնախարարության անվանը չի ավելացնում «առեւտուրը»՝ որեւէ կոնֆիգուրացիայով, որովհետեւ արտաքին գործեր ասվածը ինքնին ենթադրում է շատ լայն շրջանակ։ Լայն շրջանակ՝ այդ թվում տնտեսությունը, արտաքին տնտեսական կապերը, եւ այլն։Ըստ այդմ, բավարար է, որ ԱԳՆ կառուցվածքում առկա լինեն ընդամենը համապատասխան բաժին եւ մասնագետներ, ու այն, որ կոնկրետ անվանման մեջ առեւտւրը կամ տնտեսությունը բացակյում են, դրանից աշխատանքի արդյունավետությունը կախված չէ բացարձակորեն։
Օրինակ, եթե կոչվի՝ արտաքին գործերի եւ տիեզերքի նախարարություն, դրանից Հայաստանը չի դառնալու տիեզերական աշխատանք իրականացնող երկիր։Հետեւաբար, անվանումների այս աճպարարությունը ունի մեկ նպատակ՝ տարալուծել բուն իմաստները։ Իսկ բուն իմաստները տարալուծում են մի դեպքում՝ երբ դրանք արդեն դառնում են ավելորդ, անցանկալի»,-գրել է նա։