Այսօր Նիկոլ Փաշինյանի հրամանով Առողջապահության փոխնախարար նշանակված Սամվել Խարազյանը 9 անշարժ գույք ունի։ Այս մասին տեղեկանում ենք Կոռուպցիայի կանխարգելման հանձնաժողովից։ Անշարժ գույքերից 4-ը Երևանում գտնվող բնակարաններ են, 3-ը գնել է 2010թ, 2017թ, 2020թ-ին, իսկ մեկը նվեր է ստացել 2017թ-ին։ 2022թ-ին Աբովյանում 2 հողամաս է գնել, իսկ 2024թ-ին՝ ամառանոց, կրկին Աբովյանում։ Մյուս երկու անշարժ գույքերը ավտոտնակներ են, որոնք ձեռք է բերել 2017թ եւ 2020թ-ին։ Խարազյանը 2022թ-ին գնել է նույն տարի թողարկված MG մակնիշի ավտոմեքենա։ Նա Ակբա բանկում ունի 4,5 մլն դրամի բաժնային արժեթղթեր, ինչպես նաև 8 մլն 223 հազար դրամ և 14 հազար դոլար պարտքային արժեթղթեր։ 4 քաղաքացի Սամվել Խարազյանին մեծ գումարներ են պարտք։ Մասնավորապես Ռուբեն Կարապետյանին նա 270 հազար դոլար պարտքով գումար է տվել, Արշակ Թորոյանին՝ 10 մլն 925 հազար դրամ, Կարեն Այվազյանին՝ 21 հազար եվրո, իսկ Արթուր Ավագյանին՝ 3 մլն դրամ։ Ամբողջը միասին մոտ 121 մլն 321 հազար դրամ կամ 332 հազար դոլար է կազմում։

Փոխնախարարի բանկային հաշիվների մնացորդները կազմել են 2 հազար եվրո, 11 հազար 762 դոլար և 12 մլն 168 հազար դրամ։ Իսկ կանխիկ ունեցել է 500 դոլար, 200 եվրո եւ 460 հազար դրամ։ 2025թ-ի ընթացքում նրա եկամուտները կազմել են 47 մլն 60 հազար 846 դրամ, որից 13 մլն 155 հազար դրամը ստացել է աշխատավարձ՝ Առողջապահության նախարարությունից, մնացած գումարը գոյացել է փոխառությունների դիմաց ստաված եկամտից ու գույքերի վարձակալություններից։

Խարազյանը 22 մլն 162 հազար 323 դրամի գույքի վերանորոգում է իրականացրել։

Նրա կինը՝ Մարինա Սարգսյանը 373 հազար դրամ եւ 1577 եվրո բանկային հաշվի մնացորդ է հայտարարգրել, ինչպես նաև 2 մլն դրամ ավանդ եւ դրանից ստացած 180 հազար դրամ եկամուտ։