Շանհայի համագործակցության կազմակերպության գագաթնաժողովին ներկա գտնվելու համար երեկ Ղրղզստանի մայրաքաղաք Բիշքեք մեկնեց նաև Նիկոլ Փաշինյանն` իր «անփոխարինելի» պատվիրակությամբ՝ փոխվարչապետ Մհեր Գրիգորյան, ԱԳՆ Արարատ Միրզոյան, ԱԽՔ Ալեն Սիմոնյան, ՏԿԵ նախարար Դավիթ Խուդաթյան, ԿԳՄՍՆ Ժաննա Անդրեասյան:

Բնականաբար, առաջին բանը, որ արել է Փաշինյանը՝ Ադրբեջանի նախագահ Ալիևի ու նրա պատվիրակության հետ հանդիպումն է եղել ու հակահայկական բովանդակությամբ պայմանավորվածություններին հավատարիմ մնալու մասին հերթական հավաստիացումները: Մինչ Ղրղզստանն ու Չինաստանը ռազմավարական նշանակության համաձայնագիր են կնքում, Փաշինյանը բավարարվում է Ալիևի հետ հանդիպմամբ, որտեղ բացակայում են Հայաստանի եւ Ադրբեջանի դրոշները: Այսօր նա ՌԴ նախագահ Պուտինի հետ է հանդիպելու, որն այս այցի գլխավոր նպատակն է:

Գերագույն խորհրդի նախկին պատգամավոր, քաղաքական վերլուծաբան Սուրեն Զոլյանը «Հրապարակի» հետ զրույցում նկատում է, որ Հայաստանը Շանհայի համագործակցության կազմակերպության` ՇՀԿ-ի անդամ չէ, հետևաբար Փաշինյանը կարող էր և չմասնակցել այդ գագաթնաժողովին: «Բնական է, որ այնտեղ լինելու են աշխարհի առաջնորդներ, որոնց հետ, փաստորեն, Հայաստանը ոչ մի ձևով չի առնչվում, իսկ վաղը սպասվում է հանդիպում Պուտինի հետ: Եթե հաշվի առնենք ռուս պաշտոնյաների հայտարարությունները, որոնք նախորդում են Պուտին- Փաշինյան հանդիպմանը, Փաշինյանին այնտեղ լավ բան չի սպասվում: Հայաստանի համար, բայց նախ և առաջ Փաշինյանի համար ոչ մի լավ բան չի սպասվում, որովհետև անմիջապես ասվում է, որ Փաշինյանը չի կարողացել իր խոսքի տերը լինել, զբաղված է խաբեությամբ, պաշտոնական մակարդակով է դա ասվում, իսկ Ռուսաստանի գլխավոր պատասխանատուն, որը ոչ թե Լավրովն է, այլ ՈՒշակովը՝ Պուտինի օգնականը, ում դիրքն ավելի ծանրակշիռ է, ինչ-որ ձևով բացեց փակագծերը, ասելով, որ քննարկելու են նախևառաջ այն հարցը, թե ինչու են Հայաստանում քաղաքական հետապնդումների ենթարկվում այն քաղաքական գործիչները, որոնք ուզում են նորմալ հարաբերություններ հաստատել Ռուսաստանի հետ: ՈՒշակովի այդ հայտարարությունը շատ զարմանալի է, որովհետև ՌԴ նախագահի օգնականը հազվադեպ է ելույթ ունենում, հատկապես նախորդող իրադարձությունների համար, դա երևի թե ակնարկ է միգուցե Փաշինյանի համար: Բայց եթե գնում է այնտեղ, ուրեմն ստիպված է դա անել, սպասենք վաղվան»,-ասաց Զոլյանը:

Քաղաքական վերլուծաբանը, անդրադառնալով Փաշինյան-Ալիև հանդիպմանն, ասաց, որ Փաշինյանը օգտագործելով առիթը, պիտի զեկուցի Ալիևին, թե ինչն է արվել: «Պետք է անդրադառնալ անցյալ տարվա Ալիևի շատ ցինիկ պահվածքին, որ վերջում ասել է, թե` դու Փաշինյան, տնային աշխատանք ունես կատարելու: Այսինքն, մարդը բացեիբաց ասում է՝ ես ունեմ հանձնարարականներ, որ դու պիտի կատարես, իսկ Փաշինյանը դրան ոչ մի կերպ չի արձագանքել: Այսօր գլուխը կախ բացատրում է, թե ինչու պետք է փոխել Սահմանադրությունը, մանկլավիկները բացատրում են, թե ինչու պետք է փոխել պատմության դասագրքերը: Իմ կարծիքով նաև հետապնդումները, այդ թվում նաև Քոչարյանի ու եկեղեցու դեմ հալածանքները, դրանք նույնպես թեև Ալիևը դրանց մասին չի հայտարարել, բայց այդ ծրագրի մեջ տեղավորվում է այս ամենը՝ Տիգրանաշենի հարցը և այլն, այսինքն, մարդը գնացել է ատչյոտ տալու»,- շեշտեց Զոլյանը:

Իհարկե այս հարթակը ներկայացուցչական է` բավականին ծանրակշիռ առաջնորդներ են մասնակցում, բայց պետք է հիշել, որ Բիշքեքում հավաքվում են այն ղեկավարները, ովքեր չեն մտնում Միացյալ Նահանգներ- Եվրոպա, այսպես ասած` կոլեկտիվ Արևմուտք հասկացության մեջ: «Նրանցից շատերը, ճիշտ է` ունեն սերտ հարաբերություններ, ինչպես որ Թուրքիան, բայց այնուամենայնիվ, իրենց անջատ են պահում: Միակ բացառությունը փաստորեն դառնում է Հայաստանը, ով ասում է, որ գնում է դեպի Եվրոպա, բայց գնում է ՇՀԿ-ի հավաքներին»,- նկատեց Սուրեն Զոլյանը: