Այսօր Երեւանում` Ազգային պատկերասրահում, տեղի ունեցավ երբեւէ տեղի ունեցած գրքի «ամենաանվտանգ» շնորհանդեսը։ Շնորհանդեսի մեկնարկից առաջ անվտանգային միջոցառումներն ամենեւին կապված չէին գրքի հեղինակի` Անվտանգության խորհրդի նախկին քարտուղար Արմեն Գրիգորյանի անձի հետ, այլ հյուրերից մեկի` վարչապետ Նիկոլ Փաշինյանի այցի: Փաշինյանը ժամանեց Արմեն Գրիգորյանին փոխարինած Ալեն Սիմոնյանի հետ։ Ի դեպ, այսօր նրա հարսանիքն էր` նա երրորդ անգամ եկեղեցով պսակադրվեց իրենից 20 տարի փոքր մոդելի հետ, բայց նա հարսանիքի օրով ժամանակ էր գտել ու եկել Արմեն Գրիգորյանի գրքի շնորհանդեսին, թեեւ Գրիգորյանն այդ ժեստն արհամարհեց։ Պատվավոր հյուրերի անունները թվարկելիս ու նրանց ներկա գտնվելու համար երախտագիտություն հայտնելիս Արմեն Գրիգորյանը ցուցադրաբար անտեսեց առաջին շարքում նստած Ալեն Սիմոնյանին` նրա անունը չտալով: Պարզ է, որ Գրիգորյանը պաշտոնազրկվեց, որ խորհրդարանից դուրս մնացած Ալեն Սիմոնյանն անգործ չմնա:

Հյուրերի շարքում մեծ թվով ՔՊ-ականներ կային, ինչպես նաեւ մարդիկ, ովքեր ընդդիմադիր կամ չեզոք են փորձում իրենց դրսեւորել։ Մասնավորապես Գարեգին Միսկարյանը, Դանիել Իոաննիսյանը, ԱԳ նախկին նախարար Զոհրապ Մնացականյանը եւ այլք։

Գրիգորյանի խոսքով գիրքը սկսել էր գրել վաղուց` այն պետք չէ կապել իր պաշտոնանկության հետ, իսկ այն գրելու համար անհրաժեշտ է եղել հին տեսագրությունները դիտել ու 2018 թ-ը վերապրել։ Գրքում մանրամասն նկարագրված են նաեւ հեղափոխության օրերին տեղի ունեցած կուլիսային քննարկումներն ու գծված պլանները։

Իսկ Նիկոլ Փաշինյանն իր ելույթում երկու կարեւոր հայտարարություն արեց` «Այս 8 տարում եղել են օրեր, որ անիծել եմ այն օրը, երբ ես դարձա ՀՀ վարչապետ», «Մեզ նոր հեղափոխություն է պետք»։ Թե ում եւ ինչ մեսիջ էր փոխանցում Նիկոլ Փաշինյանը, դժվար է ասել, սակայն նրա այս հայտարարությունները վստահաբար անհասցե չէին։