ԱՄՆ-ի և Իրանի միջև զինված հակամարտությունը կարող է տևել ևս վեց ամիս։ Այս կարծիքը հայտնել է Պենտագոնի նախկին ղեկավար (2011-2013) և Կենտրոնական հետախուզական վարչության նախկին տնօրեն (2009-2011) Լեոն Պանետան բրիտանական The Guardian թերթին տված հարցազրույցում։

«Կարծում եմ՝ կա հնարավորություն, որ այս պատերազմը կարող է շարունակվել ևս վեց ամիս՝ առանց հանգուցալուծման, – ասել է նա, – Գաղտնիք չէ, որ Միացյալ Նահանգները և Իրանը գտնվում են սարսափելի փակուղու մեջ։ Այս պատերազմը դադարեցնելու շատ քիչ կենսունակ տարբերակներ կան»։

Պանետայի խոսքով՝ ԱՄՆ նախագահ Դոնալդ Թրամփի վարչակազմը ռիսկի է դիմում ներքաշվել «Մերձավոր Արևելքում հավերժական պատերազմի» մեջ։ Նա մտավախություն է հայտնել, որ Վաշինգտոնը գնում է դեպի «ևս մեկ ձախողված պատերազմ», նման Իրաքում և Աֆղանստանում մղվածներին։

Նախկին պաշտոնյայի կարծիքով, հակառակորդները «տեսնում են ԱՄՆ ներկայիս ղեկավարության թուլությունը», որն ի վիճակի չէ ապահովել իր երկրի անվտանգությունը։

Պենտագոնի նախկին ղեկավարը կարծում է, որ Թրամփը «ինքն իրեն փակուղի է մտցրել»՝ նշելով, որ ամերիկացի առաջնորդն ունի հետագա գործողությունների երեք տարբերակ։

Առաջինը՝ «խոստովանել, որ սա ձախողված պատերազմ է» և պարզապես կրճատել ռազմական գործողությունները, որը Պանետան անհավանական է անվանել։ Երկրորդը՝ շարունակել ավիահարվածները՝ առանց էսկալացիայի։ Սա վտանգում է երկարաձգել հակամարտությունը, հավելել է նա։

Երրորդ տարբերակը Հորմուզի նեղուցի վրա վերահսկողություն հաստատելն է և այդպիսով զրկել Իրանին իր գլխավոր հաղթաթղթից։