Ինչու է պիկ ժամերին մետրոյում սարսափելի վիճակ ստեղծվում
Tue, 08 Sep 2026 11:36:51 +0400
Երևանի ավագանու նիստում մետրոպոլիտենի աշխատանքին և շարժակազմի սակավությանը վերաբերող հարց է բարձրացվել։
Ավագանու անդամ Իզաբելլա Աբգարյանի խոսքով՝ Երևանի մետրոպոլիտենն իր ամբողջ հնարավորություններով չի գործում, և հիմնական պատճառներից մեկը գործող շարժակազմի պակասն է։
Նա նշել է, որ հատկապես պիկ ժամերին մետրոյում մեծ կուտակումներ են առաջանում, ինչի հետևանքով ուղևորները հաճախ չեն կարողանում տեղավորվել գնացքներում և դժգոհում են ստեղծված իրավիճակից։
Աբգարյանը փոխքաղաքապետ Սուրեն Գրիգորյանից հետաքրքրվել է, թե երբ է նախատեսվում մետրոպոլիտենը համալրել նոր շարժակազմով և ապահովել գնացքների լիարժեք շահագործումը։
Փոխքաղաքապետը հայտնել է, որ նոր շարժակազմի ձեռքբերման ուղղությամբ արդեն մրցույթ է անցկացվել։ Այժմ քաղաքային իշխանությունները սպասում են կառավարության կողմից անհրաժեշտ ֆինանսավորման տրամադրմանը։
Գրիգորյանի խոսքով՝ նախատեսվում է ոչ միայն նոր գնացքներ ձեռք բերել, այլև վերանորոգել մետրոպոլիտենի գործող շարժակազմը։ Նա ընդգծել է, որ Երևանի մետրոպոլիտենի արդիականացումը քաղաքային իշխանությունների ծրագրերի կարևոր ուղղություններից է։