Հռոմի պապ Լևոն XIV-ը կոչ է արել նոր ջանքեր գործադրել խաղաղություն հաստատելու համար՝ հիշելով 2001 թվականի սեպտեմբերի 11-ին ԱՄՆ-ում տեղի ունեցած ահաբեկչական հարձակումների զոհերին։ Կաթոլիկ եկեղեցու առաջնորդը այս հայտարարությունն արել է կիրակի օրը՝ ողբերգության 25-րդ տարելիցից երկու օր անց, հաղորդում է Associated Press-ը։

Ավանդական կիրակնօրյա «Հրեշտակ Տեառն» աղոթքից հետո Սուրբ Պետրոսի հրապարակին նայող իր աշխատասենյակի պատուհանից անգլերենով ելույթ ունենալով՝ Լևոն XIV-ը նշել է, որ սեպտեմբերի 11-ին լրացել է ԱՄՆ-ում տեղի ունեցած ահաբեկչությունների 25 տարին։

«Ես կրկին իմ աղոթքներն եմ հղում նրանց համար, ովքեր զոհվել են, և նրանց համար, ովքեր շարունակում են կրել այդ ողբերգական օրվա վերքերը»,— ասել է պոնտիֆիկոսը։

Նա կոչ է արել հավատացյալներին աղոթել խաղաղության համար՝ աշխարհում բազմաթիվ զինված հակամարտությունների և բռնության դրսևորումների ֆոնին։

«Այն ժամանակ, երբ հակամարտություններն ու բռնությունն անդրադառնում են մեր այսքան շատ եղբայրների ու քույրերի, ես կոչ եմ անում բոլորին աղոթել, որպեսզի Տերը աշխարհին խաղաղություն պարգևի ,— հայտարարել է Լևոն XIV-ը։

Այնուհետև, անցնելով իտալերենին, պապը հավելել է. «25 տարի առաջվա ողբերգական իրադարձությունների հիշատակը մեզ մղում է կրկին վերահաստատելու մեր նվիրվածությունը խաղաղությանը՝ առաջին հերթին աղոթքի միջոցով»։

Լևոն XIV-ի համար այս օրը նաև անձնական նշանակություն ունի։ Չիկագոյից սերող Ռոբերտ Ֆրենսիս Պրևոստը, որը դարձել է պատմության մեջ ԱՄՆ-ից առաջին Հռոմի պապը, 2001 թվականի սեպտեմբերի 11-ին գտնվում էր Հռոմում, որտեղ անցկացվում էր իր ավգուստինյան միաբանության մեծ ժողովը։ Այդ ժամանակ նա ղեկավարում էր միաբանության ամերիկյան պրովինցիան։ Երեք օր անց՝ իր ծննդյան օրը, Պրևոստն ընտրվեց ավգուստինյանների գլխավոր առաջնորդ։ Նա այս պաշտոնը զբաղեցրել է երկու անընդմեջ ժամկետ՝ մինչև 2012 թվականը։

Կիրակի օրը Վատիկանի լրատվամիջոցները նաև հիշեցրել են Պրևոստի՝ որպես գլխավոր առաջնորդի իր առաջին քարոզի մասին, որը նա արտասանել էր 2001 թվականի սեպտեմբերի 21-ին։ Այն ժամանակ ապագա պապն ասում էր, որ աշխարհը չի կարող մոռանալ սեպտեմբերի 11-ի ողբերգությունը՝ բռնության տարածումը կապելով սոցիալական խնդիրների, ծայրահեղ աղքատության և անարդարության հետ։

«Ատելությունն ու բռնությունը կշարունակեն աճել այնքան ժամանակ, քանի դեռ այսքան շատ մարդիկ հարկադրված են ապրել ծայրահեղ աղքատության մեջ և ենթարկվել անարդարության բազմաթիվ ձևերի»,— ասել էր նա այն ժամանակ։