«Դուք չնշեցիք Ադրբեջանի ագրեսիայի մասին»․ ԱԺ-ում Վարդանովը դիմեց Ռուբինյանին
Mon, 14 Sep 2026 10:46:17 +0400
Ազգային ժողովում մեկնարկել է 9-րդ գումարման երկրորդ նստաշրջանը։ Նիստի մեկնարկը տրվել է Հայաստանի Հանրապետության օրհներգի կենդանի կատարմամբ, որից հետո ԱԺ նախագահ Ռուբեն Ռուբինյանը ներկայացրել է հերթական քառօրյա նիստերի օրակարգը։
Նիստի ընթացքում պատգամավորները մեկ րոպե լռությամբ հարգել են 2022 թվականի սեպտեմբերյան ռազմական գործողությունների հետևանքով զոհվածների հիշատակը։
Առաջարկը հնչեցրել է «Ուժեղ Հայաստան» խմբակցության պատգամավոր Վաղինակ Վարդանովը։ Նա ընդգծել է, որ նիստի մեկնարկին ԱԺ նախագահը չի անդրադարձել Ադրբեջանի կողմից Հայաստանի դեմ իրականացված ռազմական ագրեսիայի տարելիցին։
«Պարոն Ռուբինյան, քանի որ դուք չնշեցիք Ադրբեջանի կողմից մեր պետության դեմ 4 տարի առաջ տեղի ունեցած ագրեսիայի մասին, որի ընթացքում հարյուրավոր մեր քաջորդիներ կյանքի ու մահվան կռիվ էին մղում առաջնագծում, առաջարկում եմ մեկ րոպե լռությամբ հարգել մեր զոհերի հիշատակը», — հայտարարել է Վարդանովը։
Պատգամավորի առաջարկից հետո խորհրդարանի նիստերի դահլիճում մեկ րոպե լռությամբ հարգել են սեպտեմբերյան մարտերի ընթացքում զոհվածների հիշատակը։