Սեպտեմբերի 19-ին Արցախի բռնի տեղահանության օրը, երբ հարյուրավոր մարդիկ զոհվեցին, Հայաստանում փառատոնների, մշակութային միջոցառումների և համերգների օր է հայտարարվել: Փաշինյանական ռեժիմը ոչ միայն կտոր-կտոր տարածքներ է հանձնում Ադրբեջանին, Տիգրանաշենը Քյարքի անվանում, և Արցախի էջը փակված համարում, այլև անարգում ու ծաղրում է մարդկանց վիշտը: Ադրբեջանական իշխանության հետ միացած՝ հայ մարդկանց անարգանքի են ենթարկում: Մենք տեղեկացանք, որ սեպտեմբերի 19-ը Հայաստանում բավական հագեցած միջոցառումների օր է՝ ուրախ-զվարթ միջոցառումներ, ուտել-խմելուն առնչվող փառատոններ։ Այդ օրը տարբեր մարզերում և Երևանում նախատեսված են ինչպես ավանդական փառատոններ, այնպես էլ համերգներ, թատերական ներկայացումներ և մշակութային ծրագրեր։

Գաթայի փառատոն՝ Խաչիկում

Օրվա գլխավոր ավանդական փառատոններից մեկը Գաթայի փառատոնն է, որը սեպտեմբերի 19-ին կանցկացվի Վայոց ձորի Խաչիկ գյուղում։ Փառատոնը նվիրված է հայկական ավանդական գաթային և գյուղական մշակույթին։ Փառատոնի պատասխանատուներից մեզ ասացին, որ Արենիի համայնքապետարանն է փառատոնի կազմակերպիչը: Փառատոնի ընթացքում նախատեսվում են գաթայի պատրաստման և թխման ցուցադրություններ, տեղական արտադրանքի ու ձեռագործ աշխատանքների ներկայացում, ազգային երաժշտություն և պարեր։ Ավանդաբար փառատոնի ամենասպասված հատվածներից մեկը մեծ գաթայի պատրաստումն ու հյուրերի հետ դրա համտեսն է։ Փառատոնի էջում նշված է, որ Խաչիկի փառատոնը նաև հնարավորություն է այցելելու Վայոց ձորի բարձրադիր գյուղ, ծանոթանալու տեղի ավանդույթներին և համտեսելու տեղական արտադրանքը։ Այս ամենի կլիներ նորմալ, նույնիսկ` ողջունելի, եթե չլիներ սեպտեմբերի 19-ին:

«Բերքի տոն 2026»՝ Ձորաղբյուրում

Սեպտեմբերի 19-ին Ձորաղբյուրում կանցկացվի նաև «Բերքի տոն» փառատոնը։ Այն 2026 թվականին անցկացվում է արդեն 13-րդ անգամ։ Փառատոնի կենտրոնում հայկական գյուղական կյանքն ու ավանդույթներն են։ Այցելուներին սպասվում են տեղական արտադրանքի ցուցահանդես-վաճառք, համտեսներ, ավանդական և մշակութային ծրագիր, ինչպես նաև ընտանեկան ժամանց։ Միջոցառումը կանցկացվի Կանաչ Ուսուցման Կենտրոնում՝ Բանակի փողոց 18 հասցեում, և նախատեսված է 11:00-ից մինչև 23:00-ը։ Մուտքն անվճար է։ Փառատոնից ներկայացուցչին «Հրապարակը» հարց ուղղեց` ինչո՞ւ հենց սեպտեմբերի 19-ին, և ո՞վ է փառատոնի կազմակերպիչը, սակայն ներկայացուցիչը լսելով մեր հարցերը, արագ ասաց, որ իրավասու չէ պատասխանել մեր հարցերին:

Ազգային ծիսական փառատոն՝ Զառ գյուղում

Սեպտեմբերի 19-ին Կոտայքի մարզի Զառ գյուղում նախատեսված է ևս մեկ մշակութային միջոցառում՝ Ազգային ծեսերի փառատոնը։ 2026 թվականի փառատոնի թեման հայկական հարսանեկան ծեսերն են։ Ծրագիրը նախատեսում է ավանդական երգի ու պարի ուսուցման հատվածներ, արհեստների վարպետության դասեր, երեխաների խաղեր և ամբողջական ծիսական ներկայացում, որին այցելուները կարող են ոչ միայն հետևել, այլև մասնակցել։ Նախատեսված է նաև կենդանի երաժշտության համերգ: Սեպտեմբերի 19-ին Երևանում նույնպես մի շարք միջոցառումներ են նախատեսված։ Օրինակ․ Արամ Խաչատրյան համերգասրահի տանիքում նախատեսված է Խորեն Լևոնյանի «Կինո ու մի քիչ ավելին» ծրագիրը։ Միջոցառման տոմսերի արժեքը նշված է 25,000 դրամ։ Մենք տեղեկացանք, որ համերգային ծրագիր է նախատեսված նաև «Սիզնսի» այգում: Մեզ նաև տեղեկացրել էին, որ Ապարանում էլ ազգային պարերի հետ կապված միջոցառում է նախատեսված: