«Ուժեղ Հայաստանը» պատրաստ է հանդիպել Արցախի իշխանությունների հետ
Tue, 15 Sep 2026 12:25:50 +0400
«Ուժեղ Հայաստան» կուսակցությունը պատրաստ է ընդունել Արցախի իշխանությունների առաջարկը և մասնակցել նախատեսվող հանդիպումներին ու քննարկումներին։ Այս մասին լրագրողների հետ զրույցում հայտարարել է կուսակցության խորհրդարանական խմբակցության ղեկավար Նարեկ Կարապետյանը։
Նրա խոսքով՝ առաջնահերթ խնդիրներից մեկը պետք է լինի արցախահայության իրավունքների պաշտպանությունը և առկա սոցիալական խնդիրների լուծման ուղղությամբ աշխատանքը։
Կարապետյանը նշել է, որ Արցախից բռնի տեղահանված քաղաքացիները շարունակում են բախվել մի շարք դժվարությունների։ Մասնավորապես, բնակարանների թանկացման պայմաններում պետական աջակցության շրջանակում տրամադրվող գումարները շատերի համար բավարար չեն սեփական տուն ձեռք բերելու համար։ Միաժամանակ, ըստ նրա, արցախահայության շրջանում առկա է նաև գործազրկության լուրջ խնդիր։
Կուսակցության խմբակցության ղեկավարը կարևորել է նաև արցախահայության միասնական կազմակերպական և մշակութային կառույցի ստեղծումը։ Նրա գնահատմամբ՝ անհրաժեշտ է ձևավորել այնպիսի մեծ կազմակերպություն, որը ոչ միայն կներկայացնի արցախահայության շահերը, այլև կնպաստի համայնքի մշակութային ինքնության պահպանմանը։
Կարապետյանի խոսքով՝ այդ նպատակով կարող է ստեղծվել մշակութային կենտրոն, որտեղ հատկապես երիտասարդ սերունդը հնարավորություն կունենա պահպանել և կիրառել հայոց լեզուն, ինչպես նաև շարունակել կապը Արցախի մշակութային ժառանգության հետ։
Նա ընդգծել է, որ արցախահայության համար գլխավոր նպատակն Արցախ վերադարձի իրավունքի իրացումն է, սակայն դրան զուգահեռ անհրաժեշտ է պահպանել համայնքի ներսում կապերն ու միասնականությունը։
Արցախի իշխանությունները 2026 թվականի խորհրդարանական ընտրություններից հետո քաղաքական խորհրդակցություններ են սկսել Հայաստանի խորհրդարանական և արտախորհրդարանական ուժերի հետ։ Քննարկումների նպատակն է հստակեցնել Արցախի պետական ինստիտուտների պահպանման, արցախահայության իրավունքների պաշտպանության և Արցախի իշխանությունների հետագա գործունեության վերաբերյալ քաղաքական մոտեցումները։