Մենք երեկ նամակ էինք ստացել, որ հոկտեմբերի սկզբին կայանալիք Աշխարհի առաջնությանն ընդառաջ՝ Սամբոյի ֆեդերացիայի ղեկավարությունը ազգային հավաքականի մարզիկներից պահանջում է վճարել 600,000-ական դրամ՝ միջազգային մրցումների ուղարկելու համար։ Նամակագիրը նշել էր, որ այս պահանջը ոչ միայն ծանր ֆինանսական բեռ է մարզիկների համար, այլև ուղղակիորեն հարցականի տակ է դնում նրանց մասնակցությունը, քանի որ շատերն ունենալով բարձր մարզական որակավորում՝ չունեն նման գումար, որ վճարեն եւ մրցումների մեկնեն։ Սամբոյի ֆեդերացիայի նախագահ Միքայել Հայրապետյանը «Հրապարակի» հետ զրույցում հաստատել էր, որ մարզիկներից 600 հազարական դրամ են խնդրել, որ նրանց ուղարկեն Աշխարհի սամբոյի առաջնությանը մասնակցելու, քանի որ կառավարությունը չի հոգացել Սամբոյի ֆեդերացիայի մարզիկների ծախսերը, և մինչ այս պահը այլ հովանավոր չեն կարողացել գտնել:

ԿԳՄՍ նախարարությունից մենք պարզաբանում խնդրեցինք` ի՞նչն է պատճառը, որ կառավարությունը չի ֆինանսավորել ֆեդերացիային, ի՞նչ չափի գումարի մասին է խոսքը: Նախարարությունից մեզ հայտնեցին հետևյալը. «ԿԳՄՍ նախարարության և «Հայաստանի սամբոյի ֆեդերացիա» ՀԿ-ի միջև կնքված պայմանագրի համաձայն՝ 2026 թվականին ֆեդերացիային արդեն իսկ հատկացվել է շուրջ 22.5 մլն դրամի դրամաշնորհ՝ տարբեր սպորտային միջոցառումներին սամբոյի մարզիկների մասնակցությունն ապահովելու նպատակով: Նախարարությունը տեղեկացվել է, որ հարկային ստուգումների արդյունքում ֆեդերացիայում հարկային պարտավորությունների հետ կապված խնդիրներ են առաջացել, և պայմանավորված մեկնարկած իրավական գործընթացներով՝ ֆեդերացիան հատկացված ֆինանսական միջոցների հասանելիության առումով ուներ սահմանափակումներ: Հարցը քննարկվել է ֆեդերացիայի հետ, և ըստ ներկայացված տեղեկատվության՝ առաջացած խնդիրներն այս պահին կարգավորվում են։ Նախարարությունն առաջիկա օրերին հնարավորություն կունենա սահմանված կարգով ապահովել Հունաստանի Սալոնիկի քաղաքում աշխարհի դեռահասների, պատանիների, երիտասարդների սամբոյի առաջնությանը ՀՀ մարզիկների մասնակցության ֆինանսավորումը՝ համաձայն ֆեդերացիայի հետ կնքված պայմանագրի»։