Հոկտեմբերի 25-ին Հայաստանի 21 համայնքում անցկացվելու են ՏԻՄ ընտրություններ։ Լոռու մարզի Ֆիոլետովո եւ Արագածոտնի մարզի Շամիրամ համայնքներում, որտեղ ազգային փոքրամասնություններ են ապրում, տեղի են ունենալու մեծամասնական ընտրակարգով ընտրություններ, իսկ մնացած 19-ում՝ համամասնական։

Թեեւ ընտրություններին թեկնածուների առաջադրման վերջնաժամկետը սեպտեմբերի 20-ն է, սակայն թեկնածուները չեն շտապում ԿԸՀ դիմումներ ներկայացնել։ Հավանաբար պատճառն այն է, որ ինչպես ընդդիմադիրներն են ահազանգում, առաջադրման փուլում ճնշումներ են գործադրվում թենածուների վրա, որ ընդդիմության ցուցակներ չմտնեն։

Մեր աղբյուրի փոխանցմամբ, ընդդիմությունը որոշել է վերջին պահին ներկայացնել ընտրացուցակները եւ մինչ առաջադրումը թեկնածուների անունները չհայտարարել, որ մարդկանց չստիպեն` դիմումները հետ վերցնել: Անգամ խուսափում են անվանական նշելուց, թե որ համայնքներում են առաջադրումներ լինելու։

Ի դեպ ընտրություններին մասնակցելու պատրաստակամության մասին հայտարարած «Ապրելու երկիր», «Հզոր համայնք», «Ուժեղ Հայաստան», ՀՅԴ կուսակցությունները եւ «Հայաստան» դաշինքը նշված համայնքներից որեւէ մեկում չեն առաջադրվել եւ դեռ չեն բացահայտել իրենց թեկնածուներին։ Հատկանշական է, որ իշխանությունն էլ է հապաղում թեկնածուների առաջադրման հարցում։ Այս պահին միայն հայտարարվել է Գորիսում Առուշ Առուշանյանի հետ դաշինքով մասնակցության, եւ Ստեփանավանում Լոռի Բերդ խոշորացված համայնքի գործող ղեկավար Արայիկ Ներսիսյանի թեկնածության մասին։ Ստեփանավանում առաջադրվել է նաեւ գործող համայնքապետ Արմեն Գրիգորյանը, սակայն «Գործարար» կուսակցության ցուցակով։