Գուտերեշն առաջարկում է բարեփոխել ՄԱԿ Անվտանգության խորհուրդը
Wed, 23 Sep 2026 20:00:36 +0400
ՄԱԿ Անվտանգության խորհուրդը հարկ է բարեփոխել, սակայն այնպես, որ այն արտացոլի ժամանակակից աշխարհը եւ ունենա անհրաժեշտ արդյունավետությունը։ Այս մասին հայտարարել է ՄԱԿ Գլխավոր քարտուղար Անտոնիու Գուտերեշը։ Նա ընդգծել է, որ ամենից ակնբախ օրինակը Աֆրիկան է։ Երբ ստեղծվել է ՄԱԿ-ը, Աֆրիկայի մեծ մասը գտնվել է գաղութացված վիճակում։ Այսօր, սակայն, Աֆրիկան չունի իր մշտական տեղը ՄԱԿ ԱԽ-ում։ Դա, ըստ Գուտերեշի անարդար եւ եւ թերացնում է ՄԱԿ ԱԽ գործունեությունը։
Նա նաեւ ասել է, որ միջազգային հանրությունը պետք է պաշտպանի ՄԱԿ Կանոնադրությունը առանց երկակի ստանդարտներ կիրառելու, ապահովի խաղաղ բնակիչներին եւ հումանիտար աշխատողներին, անխոչընդոտ կերպով ապահովի հումանիտար օգնության հասանելիությունը, առաջ մղի միջուկային զենքի չտարածումն ու միջուկային զինաթափումը, ինչպես նաեւ ապահովի պատասխանատու վերաբերմունք՝ անկախ քաղաքական կոնյուկտուրայից։
Գուտերեշը նաեւ արձանագրել է, որ աշխարհը գնում է բազմաբեւեռության, սակայն դա չպետք է հանգեցնի նրան, որ պառակտումը, որն այսօր առկա է, ավելի խորանա, քանի որ նման աշխարհում միշտ լինելու է մեծ լարվածություն, շուկաների մասնատվածություն, թուլացված ինստիտուտներ եւ համագործակցության սահմանափակություն։ Նրա գնահատմամբ, եթե քայլեր չարվեն, ապա այսօր աշխարհը հենց այդ ճանապարհով է գնում։