Քուվեյթից ու Կատարից ստացված գումարները․ հայտնի է՝ որքանն է ծախսվել
Thu, 24 Sep 2026 12:07:05 +0400
Քուվեյթում և Կատարում Հայաստանի Հանրապետության դեսպանությունները 2026 թվականի երկրորդ եռամսյակի ընթացքում այդ երկրների կողմից ստացել են ընդհանուր 65,3 մլն դրամի նվիրատվություն։ Ֆինանսական միջոցները նախատեսվել են դիվանագիտական ներկայացուցչությունների ընթացիկ գործունեությունն ապահովելու և անհրաժեշտ ծախսերը հոգալու համար։
Կառավարության որոշման նախագծում նշվում է, որ ստացված գումարից հաշվետու ժամանակահատվածում օգտագործվել է 37,5 մլն դրամ։ Նվիրատվությունների ստացման և դրանց հաշվին իրականացված ծախսերի տվյալները նախատեսվում է ներառել 2026 թվականի պետական բյուջեի համապատասխան ցուցանիշներում։
Նախագծի ընդունման դեպքում պետական բյուջեի եկամուտները կավելանան 65,3 մլն դրամով, մինչդեռ ծախսերի աճը կկազմի 37,5 մլն դրամ։ Այս երկու ցուցանիշների տարբերության արդյունքում պետական բյուջեի դեֆիցիտը կնվազի մոտ 27,8 մլն դրամով։
Փաստաթղթի համաձայն՝ Քուվեյթից և Կատարից ստացված միջոցներն ուղղվել են այդ երկրներում գործող ՀՀ դեսպանությունների ընթացիկ կարիքների ապահովմանը։ Միաժամանակ, նախագծում հստակեցված չէ, թե հատկապես ինչ ուղղություններով են ծախսվել հատկացված գումարները։ Մասնավորապես, չի ներկայացվում՝ միջոցներն օգտագործվել են դեսպանությունների վարձակալության, կոմունալ վճարների, ներկայացուցչական ծախսերի, թե այլ ընթացիկ կարիքների համար։