Նիկոլ Փաշինյանը, ըստ ամենայնի, շատ լավ հասկանում է, թե ինչպես է ժողովուրդը վերաբերվում հակաեկեղեցական արշավին եւ Ամենայն հայոց կաթողիկոսին գահընկեց անելու իր փորձերին: Հակառակ դեպքում նախընտրական փուլում չէր հրաժարվի այդ պայքարից: Ճիշտ է` եկեղեցու առաջնորդին փոխելու հիվանդ գաղափարը տեղ էր գտել ՔՊ-ի նախընտրական ծրագրում, բայց ո՞վ չգիտի, որ այդ ծրագրերը ո՛չ ընթերցվում են, ո՛չ էլ որեւէ դերակատարում ունեն ընտրությունների ելքի հարցում: Իսկ այդ թեզը գրվել էր մի նպատակով, որ այսօր հայտարարեն, թե քվե են ստացել ՔՊ-ի ծրագրով, ուստի ժողովուրդը կողմ է այդ ծրագրի կետերին, եւ դրանց իրականացումն օրինաչափ է:

Իրականում, միանգամայն պարզ է, որ այս իշխանությունների կողմից իրականացվող նենգ, հակահայ, հակազգային շատ քայլեր թելադրվում են դրսից, եւ պայմանավորվածությունները ձեռք են բերվում փակ դռների ետեւում: Ո՞վ գիտի, թե Նյու Յորքում Էրդողանի հետ հանդիպմանը ինչ նոր խոստումներ է տվել եւ ինչ պայմանավորվածություններ է ձեռք բերել` ընդդեմ հայ ժողովրդի: Մեր թշնամիները չեն քնում, չեն հապաղում, ժամանակ չեն կորցնում եւ թույլ չեն տալիս, որ Հայաստանում իշխանություն փոխվի, հայ ժողովուրդը բուժի իր վերքերը, գլուխը բարձրացնի, իրականության աչքերին նայի եւ սկսի վերագտնել իր կամքն ու արիությունը: Նրանք երկաթը տաք-տաք են ծեծում` օգտվելով մեր հասարակության ընկճվածությունից, այս իշխանությունների ագրեսիվ քարոզչության արդյունքում ծնված շփոթից, հենց իր` Նիկոլ Փաշինյանի գոյությունից: Փորձում են ստանալ առավելագույնը, եւ արդեն նրանց չի բավարարում հայկական Արցախը, նրանք ավելին են ուզում: Ուզում են Հայաստանը դարձնել ադրբեջանական մարզ եւ դրան խանգարող խոչընդոտներն են արդեն վերացնում` եկեղեցի, Սահմանադրություն: