«Նախաքննության գաղտնիք»․ ինչ սպասել նոր եթերաշրջանում
Fri, 25 Sep 2026 21:00:20 +0400
Ռուսական «Նախաքննության գաղտնիք» դետեկտիվ հայտնի հեռուստասերիալը, որը 25 եթերաշրջան, այսինքն՝ քառորդ դար շարունակ կարողանում է իր վրա սեւեռված պահել հեռուստադիտողի ուշադրությունը, պարզվում է՝ ունենալու է նոր՝ 26-րդ եթերաշրջան։ Առանձնապես կարեւոր գործերով ավագ քննիչ Մարիա Շվեցովան, այլ խոսքով ասած՝ վերադառնում է։
Պետք է արժանին մատուցել սերիալի ստեղծագործական թիմին, որովհետեւ ռուսական կինոյում նման երեւույթը կարելի է համարել խիստ եզակի։ Նկարահանումներն ընթանում են ՌԴ Սանկտ Պետերբուրգ քաղաքում եւ Լենինգրադի մարզում։ Ռեժիսորն է՝ Միրոսլավ Մալիչը։ Նոր եթերաշրջանը խոստանում է լինել հետաքրքիր, դիտարժան ու գրավիչ եւ ոչ միայն քրեական գործերի բացահայտումներով։ Հեղինակները որոշել են զգալիորեն ընդլայնել հերոսների անձնական կյանքի պատմությունները, թարմացնել քննչական բաժանմունքի կազմը։ Սպասվում է, որ նոր սեզոնի պրեմիերան կլինի մինչեւ աշնան վերջ։ Կենտրոնական տեղում, բնականաբար, Մարիա Շվեցովայի եւ Օլեգ Պլատոնովի հարաբերություններն են լինելու՝ քրեական բացահայտումներին զուգահեռ։
Հիշեցնենք, որ Շվեցովայի կերպարը մարմնավորել է Աննա Կովալչուկը, Պլատոնովինը՝ Ալեքսեյ Կոմաշկոն։ Հերոսների հարաբերությունները դուրս են գալիս նոր հարթություն։
Բնականաբար, հարաբերություններում հայտնվում է բավականին ծանրակշիռ խնդիր՝ ասպարեզ է մտնում Պլատոնովի արդեն հասուն դուստրը։ Պլատոնովը կանգնում է երկընտրանքի առաջ՝ մասնագիտական պա՞րտք, թե՞ հայրական ծնողական պատասխանատվություն եւ պարտավորվածություն։ Անշուշտ, դա չի կարող չանդրադառնալ նաեւ հերոսի անձնական կյանքի եւ հուզական ֆոնի վրա։ Սերունդների հակադրությունը դրսեւորվում է նոր ձեւով՝ Մարիա Շվեցովայի դստեր՝ Զլատա Շվեցովայի կերպարով։ Դերը մարմնավորել է Զլատա Կովալչուկը։ Զլատան հրապուրվում է ռոք երաժիշտով, եւ դա առաջացնում է մոր անհանգստությունն ու տագնապը։
Փոփոխություններ են կատարվում նաեւ քննչական բաժանմունքում։ Բաժանմունքը ղեկավարելու է նոր բարձրաստիճան քննիչ՝ Վասիլի Կալաչը, որի կերպարը մարմնավորելու է Իլյա Շակունովը։ Սերիալը ստեղծողները շատ բան չեն բացահայտում, սակայն խոստանում են, որ նոր քրեական գործեր են բացահայտվելու, եւ հանդիսատեսը, հաստատ, ձանձրանալու առիթ չի ունենալու։