Ի վերջո ի՞նչ է կառուցվում Աջափնյակում. բնակիչները զայրացած են
Tue, 29 Sep 2026 15:45:52 +0400
«Մայր Հայաստան» կուսակցության անդամ Սոնա Աղեկյանը ահազանգում է Արզումանյան 4 հասցեում իրականացվող շինարարության վերաբերյալ։
Նրա խոսքով՝ բազմաբնակարան շենքի անմիջական հարևանությամբ շինարարական աշխատանքներ են ընթանում, սակայն շինհրապարակում բացակայում են անհրաժեշտ տեղեկությունները։ Մասնավորապես, ըստ Աղեկյանի՝ տեղում չկա շինարարական նախագծի կամ թույլտվության մասին որևէ տեղեկություն, ինչպես նաև բնակիչներին չի ներկայացվել, թե ինչ կառույց է նախատեսվում կառուցել։
Աղեկյանը հարց է բարձրացնում՝ արդյոք տվյալ տարածքում կառուցվում է հերթական էլիտար բազմաբնակարան շենքը, թե բազմաֆունկցիոնալ համալիր։
Նա նաև անդրադարձել է շինարարության օրինականության հարցին՝ նշելով, որ եթե աշխատանքներն իրականացվում են առանց համապատասխան թույլտվության, ապա անհասկանալի է, թե ինչու այդ կառույցը չի ապամոնտաժվում, ինչպես Աջափնյակ վարչական շրջանում ապամոնտաժվող մյուս ապօրինի շինությունները։