Պապիկյանը ՊՆ նախարա՞ր է, թե՞ ճաշարանի պետ
Tue, 29 Sep 2026 20:45:03 +0400
Այս իշխանության մոտ վաղուց ձևավորվել է մի պարզ գործելաոճ՝ սեփական բացթողումներն ու անհաջողությունները տարբեր գերատեսչությունների ղեկավարների շուրջ կազմակերպվող փիառ-շոուներով քողարկել, ծածկադմփոց անել։
Օրինակ՝ բանակում ինքնասպանությունները շատացե՞լ են, ուրեմն հարկավոր է Սուրեն Պապիկյանի շուրջ փիառ-շոուներ կազմակերպել, որտեղ հատկապես շատ են սննդի հետ կապված կադրերը։ Բանակի ճաշարանում հավի բուդ, խոզի միս, տավարի միս՝ մեկը մյուսի հետևից ցուցադրվում են այնպես, ասես Պապիկյանը ոչ թե պաշտպանության նախարարն է, այլ այդ ճաշարանի պետը, կամ՝ խոհարարը։ Իհարկե, լավ է, երբ զինվորը պատշաճ և որակյալ սնունդ է ստանում։ Դրա մասին խոսելն ու դա ապահովելը պաշտպանության նախարարության պարտականություններից է։ Բայց երբ բանակում առկա լուրջ խնդիրների ֆոնին հասարակությանը փորձում են զբաղեցնել ուտելիքի ցուցադրությամբ, հարց է առաջանում՝ իսկ բանակի մյուս խնդիրների մասին ո՞վ է խոսելու։
Մարդիկ անհանգստացած են բանակում տիրող բարքերով, բարոյահոգեբանական վիճակով, երբեմն նույնիսկ աբսուրդի հասնող իրավիճակներով, որոնց հետևանքները լինում են անդառնալի։ Իսկ այդ ամենի ֆոնին մեզ ցույց են տալիս մսով ճաշ։ Այդ փիառ-շոուները դառնում են խնդիրների քողարկման պարզունակ ձև, արդյունքում կարևոր հարցերը մնում են անլուծելի։ Հասարակությանը կարելի է ցույց տալ հավի բուդ, խոզի միս կամ տավարի միս, բայց դրանով հնարավոր չէ թաքցնել բանակի իրական խնդիրները։ Սնունդը կարևոր է, բայց բանակը միայն ճաշացանկ չէ։
Հասարակությանը հնարավոր չէ խաբել մսի ցուցադրությամբ, բանակում առկա խնդիրների համար պետք է պատասխաններ տալ եւ այդ խնդիրները լուծել։ Եվ եթե որևէ մեկը կարծում է, թե մի քանի գեղեցիկ կադրով կարելի է պատասխանատվությունից խուսափել, ապա թերագնահատում է իրական խնդիրներն ու դրանց լուրջ հետևանքները։