Հոկտեմբերի 4-ը կենդանիների պաշտպանության համաշխարհային օրն է։ Այդ մասին ֆեյսբուքյան իր էջում գրել է «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը։

«Աշխարհին նայի՛ր նրանց աչքերով»․ սա է 2026 թվականի կարգախոսը։ Այն կոչ է՝ մտածելու, թե մեր որոշումներն ինչպես են փոխում այն կենդանի էակների կյանքը, որոնց հետ կիսում ենք մեր մոլորակը։

Թվերը մտորելու տեղիք են տալիս։ WWF-ի «Կենդանի մոլորակ — 2024» զեկույցի համաձայն՝ 1970–2020 թվականներին դիտարկվող վայրի ողնաշարավոր կենդանիների պոպուլյացիաների թվաքանակը միջինում նվազել է 73%-ով։

Ամենամեծ նվազումը գրանցվել է քաղցրահամ ջրերի էկոհամակարգերում՝ 85%։ Ցամաքային պոպուլյացիաների դեպքում այն կազմել է 69%, իսկ ծովայինների դեպքում՝ 56%։

Ուսումնասիրությունն ընդգրկում է 5 495 տեսակի շուրջ 35 հազար պոպուլյացիա։ Այս ցուցանիշներն արտացոլում են դիտարկվող պոպուլյացիաների թվաքանակի միջին հարաբերական փոփոխությունը, այլ ոչ թե Երկրի վրա անհետացած կենդանիների բաժինը։

Բնակավայրերի ոչնչացումը, բնական պաշարների գերշահագործումը և կլիմայի փոփոխությունը սպառնում են կենդանական աշխարհին։ Պահպանելով գետերը, լճերը, անտառներն ու ջրաճահճային տարածքները՝ մենք պահպանում ենք կենդանիների գոյության համար անհրաժեշտ պայմանները։

Կենդանիների պաշտպանությունը սկսվում է նաև ամենօրյա քայլերից՝ ընտանի կենդանիների նկատմամբ պատասխանատու վերաբերմունքից, ապաստարաններին աջակցելուց, դաժանությունը մերժելուց և վայրի բնության հանդեպ հոգատարությունից։

Աշխարհին նայի՛ր նրանց աչքերով և այն ավելի ապահով դարձրո՛ւ նրանց համար»,-գրել է նա։