«Հրապարակ»․ «Գրին Ռոքի» ավտոպարկը՝ ավագանու շտեմարան
Wed, 07 Oct 2026 08:20:20 +0400
Հոկտեմբերի 25-ին կայանալիք Դիլիջան համայնքի ավագանու համամասնական ընտրություններին «Հանրապետություն» կուսակցությունը ներկայացրել է 12 հոգանոց ընտրացուցակ, որի 2-րդ համարը 1967թ․ ծնված «Գրին Ռոք» ընկերության վարորդ Նորայր Դավթյանն է։ Դիլիջանում ասում են, որ նա «Հանրապետություն» կուսակցության նախագահ Արամ Զավենի Սարգսյանի բարեկամն է։ «Հանրապետություն» կուսակցության ավագանու ընտրացուցակի 5-րդ համարը Նորայր Դավթյանի որդին է` 1996թ․ ծնված անհատ ձեռներեց Արամ Դավթյանը։ «Գրին Ռոք» ՍՊԸ-ն նաեւ «քույր» կուսակցության` «Քաղպայմանագրի» ընտրացուցակում է հանգրվանել․ 40 հոգանոց ցուցակի 40-րդ տեղում 1990թ․ ծնված, «Գրին Ռոք» ՍՊԸ-ի վարորդ Արթուր Սողոյանն է։ Փաստորեն, «Գրին Ռոքի» ավտոպարկը Դիլիջանի ավագանու թեկնածուների շտեմարան է: Այն «Գրին Ռոքի», որը սեպտեմբերի 27-ին՝ 44-օրյա պատերազմի 6-րդ տարելիցին, Դիլիջանի պետական արվեստի քոլեջում ջազային համերգ էր կազմակերպել։