Սահմանապահ կանայք միշտ էլ պետք է խիզախ լինեն
Thu, 08 Oct 2026 22:15:08 +0400
Շաքի գյուղում տեղի ունեցած ողբերգական միջադեպից հետո մեր հանրությունը բավականին տագնապած է ու անհանգիստ: Հայաստանի իշխանությունն արդեն մի քանի տարի է հանրությանը «կերակրում» է խաղաղասիրական կեղծ թեզերով, խոսում է այն մասին, որ 2025 թ․ օգոստոսի 8-ին Վաշինգտոնում նախաստորագրված խաղաղության համաձայնագրով այլեւս տարածաշրջանում խաղաղություն է հաստատվել եւ մենք հիմա պետք է հարեւանների հետ ջան ասենք՝ ջան լսենք։ Իսկ այս դեպքը եկավ ապացուցելու, որ այդ բոլորը լեգենդ է, հորինվածք՝ ադրբեջանցիները չեն ուզում խաղաղ ապրել, նրանք առաջին իսկ հնարավորության դեպքում կրակելու են հայի վրա, նրանց երկրում շարունակ ատելություն է սերմանվում հայի նկատմամբ, իսկ մեր անպաշտպան սահմանների պարագայում այս՝ ադրբեջանցի զինված զինծառայողն անցնում է սահմանը եւ կրակում հայ անօգնական կնոջ վրա` նրա երեխաների աչքի առաջ: Այս առումով ամենախոցելի վիճակում սահմանամերձ տարածքներն են, Սյունիքի համայնքները։
Խնձորեսկի վարչական ղեկավարի պաշտոնակատար Արմինե Սաֆյանից «Հրապարակը» հետաքրքրվեց` ի՞նչ են մտածում կատարվածի մասին տեղացիները: Սաֆյանը նկատեց. «Անհանգստությունը, տագնապը միշտ էլ կա, բայց մենք ամուր կանգնած ենք մեր հողի, մեր ջրի վրա, վախը միշտ կա, բայց որ ասենք շատ վախենալու բան կա, չէ: Սիսիանում է կատարվել դեպքը, ես չեմ կարող հստակ ասել, թե ինչ ա եղել, բայց մեր սահմանապահները միշտ էլ պատրաստ կանգնած են իրենց տեղում: Անի Ավետիսյանի օրինակով հայ կանայք, առավել ևս` սահմանապահ կանայք պետք է միշտ էլ խիզախ լինեն: Այդ կինն իր երեխաներին, իր ընտանիքին պաշտպանելու համար այդ քայլին դիմեց, այդպես էլ պետք է լիներ: Մեր բնակիչները պետք է միշտ էլ պատրաստ լինեն, զգոն լինեն»:
Մենք նաև հետաքրքրվեցինք վարչական ղեկավարից, թե ի՞նչ է մտածում Գորիսի ՏԻՄ ընտրությունների մասին: Մեր զրուցակիցը շեշտեց. «Մենք բոլորս էլ գիտենք, որ պետք է ընտրենք մեր համայնքապետ Առուշ Առուշանյանին: Նա հոյակապ համայնքապետ է, թե Գորիսի համար, թե մեր համայնքների համար նա շատ բան է արել»: Բայց նրան շատերն են քննադատում ընդդիմադիր դիրքերը զիջելու, իշխանության հետ ընտրություններին մասնակցելու համար, նկատեցինք. «Դե քննադատողներ էլ կլինեն, բայց չկա դրա կարիքը: Բոլորս էլ գիտենք, թե պարոն Առուշանյանը ինչպիսի համայնքապետ է, և ինչ գործեր ունի արած: Մենք համայնքապետ ենք ընտրում, Առուշանյանը անկուսակցական է, իսկ մենք գիտենք, որ նա է այն միակը, ով պետք է լինի մեր համայնքապետը»: